Қазақстан мұсылмандар діни басқармасы биылғы Құрбан айт күндерін 6 маусымнан 8 маусымға дейін бекіткен.
Бұл туралы Caravan.kz медиа порталы хабарлайды.
Құрбан айт қарсаңында Мүфтият көпшілікті толғандырған сұрақтар легіне жауап беруде. Солардың бірі — әйел адамның құрбандық шалу мәселесі.
”Әйел адам құрбандық шалу мәселесінде ер кісімен бірдей қарастырылады. Ерге қойылатын шарттар әйел кісінің бойынан табылатын болса, яғни артық дүниесі құрбан айт күндері тұрғылықты болған болса, әйел кісінің де құрбандық шалуы міндет болады. Әлбетте, бұл жерде мойнына міндет болу керек деген өз қолымен шалу шарт деген сөз емес. Әйел кісі нәзік табиғатты болғандықтан бауыздаудан қорқатын болса, қолынан келмейтін болса, өзінің атынан біреуді уәкіл қыла алады. Тіпті қасапшыны да уәкіл ете алады”, — дейді ҚМДБ шариғат және пәтуа бөлімінің маманы Елбек Тасболатұлы.
Мүфтият ұсынған мәліметке сенсек, Ханафи мәзһабында құрбан шалу – уәжіп. Уәжіп деген – парыз бен сүннеттің арасындағы амал. Уәжіпті тәрк еткен адам сұралады. Оны орындамаған адам қазасын өтейді. Ал сүннетті тәрк еткен адам сұралмайды, қазасының өтелуі талап етілмейді.
