Құрбан айт мерекесі кезінде мал сою барысында 14 000-нан астам адам түрлі жарақат алған.
Зардап шеккендердің дені құрбандықты үй жағдайында шалғандар, деп жазады inbusiness.kz сайты Haber7.com сайтына сілтеме жасап.
Түркияның Денсаулық сақтау министрлігінің хабарлауынша, жарақаттардың көбі қолын пышақпен кесіп алу және ірі қараның астында қалу жағдайларына байланысты тіркелген.
Министр Мемишоғлы әлеуметтік желідегі парақшасында жариялаған жазбасында Құрбан айттың бірінші күні Анкарада -1049, Ыстамбұлда — 753, Конияда — 655, Газиантепте — 634 және Манисадағы 572 денсаулық сақтау мекемелерін қоса алғанда, Құрбан айттың бірінші күні 81 провинцияда барлығы 14 372 адамның өтініш білдіргенін атап өтті.
Сонымен қатар, Түркияның Ішкі істер министрлігі айт күндері жол-көлік апаттарының көбейгенін атап өткен. Ел аумағында орын алған жол апаттарынан 26 адам қаза тауып, тағы 3500 адам жараланған.
Билік тұрғындарды қауіпсіздік ережелерін сақтауға және құрбан шалу рәсімін мамандардың көмегімен арнайы орындарда өткізуге шақырды.
