Астанада жіті респираторлық вирустық инфекция жұқтырғандар көбейді. Білім басқармасы елорда мектептерінде оқу процесі штаттық режимде жүріп жатқанын мәлім етті. Ал эпидемиологтар оқушылар қашықтан оқытуға қандай жағдайда көшірілетінін айтты, деп хабарлайды KAZ.NUR.KZ.

Астанадағы эпидемиологиялық жағдай туралы NUR.KZ тілшісіне санитариялық-эпидемиологиялық бақылау департаменті өкілдері түсінік берді.

Астана қалалық санитариялық-эпидемиологиялық бақылау департаменті басшысының орынбасары Жанна Пралиеваның айтуынша, эпидемиялық маусым басталғалы, яғни 2025 жылдың 2 қазанынан бері елордада жедел респираторлық вирустық инфекцияның 36 360 жағдайы тіркелген.

Ауру көрсеткіші 100 000 адамға шаққанда 2378,4, бұл былтырғы сәйкес кезеңмен салыстырғанда 2 пайызға төмен. Басым бөлігі 14 жасқа дейінгі балалар — 59 пайыз (21298 жағдай), оның ішінде 1175 нәресте.

Соңғы бір аптада қалада жіті респираторлық вирустық инфекцияны жұқтырудың (ЖРВИ) 8 891 жағдайы тіркелді. Өткен 2024-2025 эпидемиялық маусыммен салыстырғанда ауру көрсеткіші 1,2 есеге (6 243 жағдай) өсті.

Зертханалық бақылау кезінде жіті респираторлық вирустық инфекциялармен және тұмаумен ауыратын науқастардан жиналған 194 сынама сарапталды. Барлығы 44 сынама оң нәтиже көрсеткен, ол A(H3N2) тұмауының вирусы болып шықты.

Санитариялық дәрігердің 2025 жылғы 22 тамыздағы № 6 қаулысына сәйкес:

  • Егер инкубациялық кезеңде бір сыныптың 30 пайызына дейін оқушыларында жедел респираторлық вирустық инфекция (ЖРВИ) тіркелсе, жалпы білім беру ұйымдарында кабинетте оқыту жүйесі алып тасталады және күнтізбелік он күн бойына жаңа оқушылар сабаққа жіберілмейді.
  • Жіті респираторлық вирустық инфекция жағдайлары инкубациялық кезеңде сынып оқушыларының 30 пайызында немесе одан да көп жағдайлары тіркелсе, оқушылар онлайн оқытуға көшіріледі. Медициналық мекемелерде маска кию міндетті.

Осы ретте Астана қаласы Білім басқармасының баспасөз хатшысы NUR.KZ тілшісіне қаладағы білім беру ұйымдарында оқу процесі штаттық режимде жүріп жатқанын хабарлады.

"Бетперде тағу режимі енгізілген жоқ. Мектеп ішінде кабинеттік жүйе сақталады, ауқымды іс-шаралар өткізуге уақытша тыйым салынды", — делінген хабарламада.

Мәтіннен қате тапсаңыз, бізге жазыңыз