”Қайрат” футбол клубының жартылай қорғаушысы әрі 21 жасқа дейінгі жастар арасындағы ұлттық құрама өклі Олжас Байбек “Интерге” қарсы ойында жанкүйерлер қолдауы ерекше жігер сыйлағанын айтты.
Бұл туралы Caravan.kz медиа порталы хабарлайды.
Футболшы “Спорт министрі” YouTube арнасына берген сұхбатында Еуропаның үздік футбол клубтарының негізгі артықшылықтарына тоқталды.
”Реал Мадридпен” болған ойыннан өзіме көп дүние алдым. Техника, ойлау қабілеті, жылдамдық, физика жағынан. Олар да солардың бәрі бар. Ал бізде бірі болса, бірі жетпей жатады. Ойыннан кейін бірден ойланып, өзіңнің кемшіл тұстарыңды білесің.
Ал “Интерге” қарсы ойында жоспарымыз жақсы болды. Жаттықтырушы жақсы түсіндірді. Чемпиондар лигасында мотивация берудің керегі жоқ. Өйткені бәрі ойынның маңызын түсінеді. Әркім өзін көрсеткісі келеді. Бұл ойында жанкүйерлеріміздің қолдауы жақсы болды. Ойынның алдында Италияда оқитын студенттер келіп, қолдауларын білдірді. Оның бәрі әсер етеді. Жанкүйерлерге арналған секторда ғана емес, бүкіл стадионда Қазақстанның туы көрініп тұрды. Сол да бізге жігер берді”, — дейді Олжас Байбек.
Футболшы “Интерге” қарсы ойында өзін барынша көрсетуге тырысқанын да жасырмады.
“Алаңға шыққанда 20 минут берсе де өзімді көрсеткім келді. Мүмкін, Еуропаның жақсы агенттер көрсе дедім. Негізі “Барселонада” ойнауды армандаймын”, — дейді ол.
Сондай-ақ, ол сұхбат барысында футболға қалай келгенін де айтып берді.
“Шардара ауылында өскен баламын. Ағам жаттықтырушы болған. Ауылда футбол ойнап жүрдім. Ағам бірінші лигада ойнап жүрген кезде 2014 жылы Алматы қаласында “Қайрат” академиясы ашылғанын көріп, мені әкелген. Бастапқыда академияға түскен жоқпын, бөлімшесінде жүрдім. Бір жылда екі рет қаралымға шақырды. Екіншісінде 10 жасымда академияға алды.
Кішкентай кезімде көкпаршы болғым келетін. Бізде оңтүстікте өзіміз жылқы бағамыз, көкпар аттар бағатынбыз. Бала күнімде көкпарға жиі баратынмын”, — дейді ол.
