Алматылық “Қайрат” Чемпиондар лигасының плей-офф кезеңіндегі алғашқы ойынын Шотландияда өткізді, деп хабарлайды Skifnews.kz ақпарат порталы .
Глазгода өткен матч “Селтикке” қарсы өтіп, 0:0 есебімен тең аяқталды.
Бірінші таймда “Қайрат” есеп ашқандай болған еді. Капитан Александр Мартыновичтің соққан голы офсайд анықталғаннан кейін есепке алынбады. Үзіліске дейін қос команда да қақпаға тура соққы жасай алмады. Соған қарамастан, алматылықтар бес рет қақпаға соққы бағыттаса, алаң иелері екі рет қана соққы жасап көрді.
Екінші таймда шотландиялық клуб белсенділік танытып, бірнеше қауіпті шабуыл ұйымдастырды. Алайда олардың ешбірі нәтижесіз аяқталды. Бұл кезеңде ойын қақпашылардың жарақаттарымен есте қалды. 75-минутта Александр Заруцкий жарақат алып, орнын Темірлан Анарбеков басты. Бірақ матч соңында Анарбеков те оңтүстіккореялық Ян Хен Чжунмен қақтығысып, басынан жарақат алды.
Негізгі уақытқа төреші қосқан 10 минут ішінде “Қайрат” шабуылшысы Дастан Сәтпаев сары қағаз алып, бұл оның еурокубоктағы үшінші ескертуі болды. Соның салдарынан ол қарымта кездесуде алаңға шыға алмайды.
Жауапты матч 26 тамыз күні Алматыда өтеді. Егер “Қайрат” жеңіске жетсе, Чемпиондар лигасының топтық кезеңіне жолдама алады. Ал жеңілген жағдайда команда өз жолын Еуропа лигасының негізгі кезеңінде жалғастырады.
