Жамбыл облысы, Т.Рысқұлов ауданы, Көгершін ауылының тумасы, талантты балуан Нұржан Асан АҚШ-тың Нью-Йорк қаласында өткен «Bill Farrell International 2025» турнирінен жүлделі оралды. Грек-рим күресінен 87 кг салмақта күміс медаль иеленді.
Сайысқа 300-ден астам балуан қатысты. Алғашқы айналымнан-ақ қарсыластарын айқын жеңген Нұржан финалға еркін жетті. Алтын медаль үшін тартыста америкалық балуанға ұпай айырмасымен есе жіберді. Балуан былтыр да осы бәсі жоғары турнирден жүлделі оралған еді.
– Бұл күміс медаль ұзақ жылғы төккен теріміздің өтеуі. Бізге әрбір медальдің бағасы құнды. Нұржан өте еңбекқор, талапшыл, балуан. Бұл жолы да рухының қайсарлығын көрсетті, – дейді жеке бапкері Ринат Исмаилов.
Нұржан грек-рим күресімен 12 жылдан бері тұрақты шұғылданады. 2022 жылы Бразилияда өткен XXIV жазғы Сурдлимпиада сайысында 77 кг салмақта қола медаль еншіледі. Сол жылы әлем чемпионы атанды. 2023 жылы Азия ойындарында жеңіске жетті. Былтыр еңбек сіңірген спорт шебері атағын алды. Балуан бүгінде АҚШ елінде шеберлік сабақтарын өткізіп, жас балуандарды күреске баулып жүр.
– Қай қиырда жүрсек те қазақтың рухы жоғары екенін әйгілеуге күш саламыз. Елімнің Көк туын желбіретіп, Әнұранымызды шырқату – басты мақсатым. Төрт жыл бұрын Сурдлимпиада ойындарында қола медаль бұйырды. Әркімнің де арманы – алтын медаль. Соған жету жолында тынымсыз тер төгіп, тыңғылықты әзірлік жүргіземін, – дейді талантты спортшы.
Балуан алдағы уақытта да шеберлігін шыңдап, сайыстарға қатысуға бел буып отыр.
