Германияда қаза тапқан экс-судья Айгүл Сайлыбаеваның ісі бойынша құзырлы органдар тың деректерге арқа сүйеп, тергеу жұмыстарын бастады. Бас прокуратураның бақылауындағы бұл іс марқұмның туыстарының шағымы негізінде қозғалып отыр, деп хабарлайды "КТК" арнасы.
Айгүлдің ата-анасы сыртқы істер министрлігі неміс әріптестеріне дипломатиялық нота жіберіп, қылмыскерлерді іздеу ісін жандандырады деп үміттенеді. Себебі арада бір жарым жыл өтсе де, Германия полициясы әрекетсіздік танытып, күдіктілерді іздестіру мен ұстау бойынша еш шара қолданбаған.
Еске салсақ, "Болашақ" бағдарламасының түлегі, Астанадағы аудандық соттарда бірнеше жыл судья болып істеген Айгүл Сайлыбаева шетел азаматына тұрмысқа шығып Германияға қоныс аударған.
Былтыр жазда үш жастағы қызын балабақшаға апарған бетте ізім-ғайым жоғалған судьяның мәйіті екі аптадан соң Бенсхайм қаласындағы көлдің жағасынан қара пакетке салынған күйде табылды. Денесінде зорлық белгілері бар.
Әу баста неміс тергеушілер басты күдікті ретінде марқұмның енесі Наталья Донцованы атағанымен, ол әлі ұсталмаған. Бүгінде белгілі болғандай, Айгүл жоғалған күні Донцова ұлы шақырған таксиге отырып, артынша Германиядан белгісіз бағытқа ұшып кетіпті.
Дереккөз: "КТК" арнасы
Мәтіннен қате тапсаңыз, бізге жазыңыз
