Алаяқтарға алданған алматылық Бекәлі Бәйтереков бар-жоғы 8 күннің ішінде бірнеше банктен несие рәсімдеп, құны 50 млн теңге тұратын пәтерін арзанға сатып жіберген, деп хабарлайды "Хабар" арнасы.
Барлығы "Сізге сәлемдеме келді" деген жалғыз қоңыраудан басталады. Туған күні жақындап қалған Бекәлі туысытарым тосынсый жасаған шығар деп алаңсыз сенеді. Білікті IT маманының бөтен номерден келген сілтемені ашуына осы жәйт себеп болыпты.
Іле–шала бейтаныс адам хабарласып, "алаяқтардың алдауына түстіңіз, атыңыздан несие рәсімдеп жатыр, сондықтан оны өзіңіз алғаныңыз абзал" дейді. Содан соң "пәтеріңізге шабуыл басталды, мән-жай анықталғанша сата тұрыңыз" деп тағы сендіреді.
"Сіз заңсыз нотариус, риэлторды ұстау әрекетіне көмектесіз" деп үйімді сатқызды. Ол 36 млн 500 мың теңгеге кетті. Бүкіл риэлтор адамдарды өздері тапты. Салдарынан үстімнен 5 млн 300 мың теңге несие алынды және баспанамнан айырылып қалдым", — дейді Бекәлі Бәйтереков.
Бекәлі деректердің алаяқтардың қолына оңай түсетініне қапалы. Тіпті әке-шешесінің қайда жұмыс істейтініне дейін біліп алған. Қазір ол тиісті органдарға арыз жазған. "Әзірге нәтиже болмай тұр" дейді.
Алаяқтар қолды қылған ақшаны дропперлер арқылы алатыны белгілі. Осыған байланысты қыркүйекте Қылмыстық кодекске жаңа бап енгізілді. Енді алаяқтарға көмектесетін делдалдар жазаға тартылады.
"Қазіргі таңда дропперлердің іс- әрекеттері заңға қайшы қылмыстық әрекеттер саналады. Олар Қылмыстық кодекстің нормаларымен сараланып, ол үшін бас бостандығынан айыру мерзімі көзделеді. Мұны барлық азамат білгені жөн", — дейді қалалық ПД ресми өкілі Салтанат Әзірбек.
Бұрын заңнамада "дроппер" ұғымы болмады. Жаза күшейген соң алаяқтардың жандайшаптары да азаяр деген үміт бар. Дегенмен тәртіп сақшылары "әр адам қылмыскердің айласына түспеуі үшін сақ болуға тиіс" дейді.
"Әр адам интернеттегі гигиенасын сақтау керек. Интернетте жасаған әр қадамын анықтап, алдын ала тексеріп алу керек. Түсініксіз фишингтік сайттарға, сілтемелерге кірмеулері керек. Алаяқтар қазіргі таңда жәбірленушілерін алдаған уақытта ақшаны дропперлердің шотына салады. Сол арқылы, екінші дроп, үшінші дроп арқылы қаражаттарды басқа елдерге, басқа шоттарға аударып жатады", — дейді ПД Киберқылмысқа қарсы іс-қимыл басқармасының аға жедел уәкілі Ғазиз Әуезханов.
Жуық арада қамауға алынған дроппер-әйелге сот үкімі шығады. Қылмысы ауыр болса, 7 жылға дейін бас бостандығынан айырылуы мүмкін. Онлайн-алаяқтықты тергеу кезінде полиция бірінші кезекте дропперлердің ізіне түседі. Сондықтан оңай олжаға батасың деп инвестициялық бағдарлама, онлайн жұмыс ұсынғандарға үлкен сақтықпен қараған жөн.
Авторлар: Қарлығаш Қайыпбекова, Әбен Нарымбаев, Айдос Қалиев
Мәтіннен қате тапсаңыз, бізге жазыңыз
