Ұлттық Банк Қаржы нарығын реттеу және дамыту агенттігімен бірлесіп, алдағы бес жылға арналған саланы цифрландыру стратегиясын бекітті. Бұл осы бағыттағы барлық бастаманы біртұтас Цифрлық Ұлттық Банк тұжырымдамасына тоғыстырады. Бұл туралы Ұлттық Банк төрағасы Тимур Сүлейменов Алматыда өткен Central Asia Fintech Summit-те айтты.
Жиынға 20-ға жуық елден финтех-индустрия сарапшылары, қаржы реттеушілері, банк өкілдері келді. Қатысушылар цифрлық және жасанды интеллектке негізделген бастамаларды талқылады.
Соңғы бес жылда қолма-қол ақшасыз жасалған транзакция 10 еседен аса өсіп, бөлшек саудадағы үлесі айтарлықтай ұлғайды. Ұлттық Банктің банкаралық жүйелері қолма-қол ақшасыз айналымның шамамен 90 процентін өңдеп, осы жылдың тоғыз айында бір квадриллион теңгелік межені еңсерді. Қаржы секторының цифрлануы GovTech-тен бастап электрондық коммерцияға дейінгі басқа салаларға да оң әсер етті.
Тимур Сүлейменов, ҚР Ұлттық Банк төрағасы:
- Активтер қаржы жүйесінің толыққанды бөлігіне айналуға тиіс. Оларды дұрыс әрі тиімді біріктіру оңай емес. Біз бөлек немесе параллель нарық құруды көздемейміз, оны бұрыннан бар қаржы жүйесіне біртіндеп интеграциялауды басшылыққа алып отырмыз. Бұл ретте ашықтық, сенімділік және қадағалаудың бірыңғай стандарттарын сақтаймыз.
Саммиттің бірінші күні еліміздегі алғашқы «жасыл» токен іске қосылды. Жаңа цифрлық актив қоршаған ортаны қорғауға және тұрақты жобаларға инвестиция салуға бағытталған.
Берік Шолпанқұлов, ҚР Ұлттық Банкі төрағасының орынбасары:
- Қоршаған ортаны қорғау аясында жасыл акциялар шығарылғанын білесіздер. Бұл кәдімгі акциялармен бірдей, тек цифрлық форматта. Токен эмитент пен инвестордың мұндай акцияларды сатып алуға қатысу мүмкіндігін жеңілдетеді.
Қазір Ұлттық Банктің реттеушілік сынақ алаңында токендеу мен стейблкоинге қатысты шамамен 15 жоба сынақтан өтіп жатыр. Жыл соңына дейін банктің Ұлттық инвестициялық корпорациясы базасында Мемлекеттік цифрлық активтер қоры іске қосылады деген жоспар бар.
Авторлары: Қарлығаш Қайыпбекова, Мұхит Құдықбаев
