Саладағы медианалық жалақы 400 мың теңгеге жуықтаған.
Денсаулық сақтау вице-министрі Тимур Мұратов Үкімет отырысынан кейінгі баспасөз мәслихатында дәрігерлердің орташа жалақысы қандай екенін айтты, деп хабарлайды inbusiness.kz сайты.
Тілшілер "Threads желісінде патологоанатом дәрігер өзінің айлығы 120 мың теңге екенін жазды. Бұл медицина маманы үшін жеткілікті жалақы деп ойлайсыз ба?" деп сұрады.
"Шынын айтқанда, менің жеке пікірім бойынша бұл аз. Біз дәрігерлерге аз төлеп отырмыз. Жалпы алғанда дәрігерлік қызмет, клиникалық медицина – әлемде ең жоғары жалақы төленетін салалардың бірі. Бірақ елдегі қазіргі экономикалық жағдайды ескеруіміз қажет", – деді вице-министр.
Оның сөзінше, елдегі барлық ауруханалар мен емханалар МӘМС және ТМККК шеңберінен тыс қызметтер көрсетіп, қосымша табыс таба алады. Түскен қаражатты аурухана өзінде қалдырмай, оны медицина қызметкерлеріне қосымша ақы немесе сыйақы түрінде бере алады.
Тимур Мұратов медицинада дәрігерлердің медианалық жалақысы шамамен 400 мың теңгедей екенін жеткізді.
Айта кету керек, бұған дейін елдегі 60 мыңға жуық адам тегін дәрі ала алмай қалуы мүмкін екенін жазғанбыз.
