Балқаш ауданында «Бауыржан-7» жауапкершілігі шектеулі серіктестігінің алқаптарында күріш жинау науқаны қарқынды жүргізіліп жатыр. Ала жаздай күтіп-баптаған ақ маржанды ысырапсыз жинап алуға қажетті барлық ауыл шаруашылығы техникасы толық жұмылдырылған.

Егіс алқабындағы ком­байн­­дар­дың тынымсыз қо­з­­­ға­лы­сы еңбек көрігін қыз­ды­­ру­мен қатар орақ науқанының уақ­­ты­лы, сапалы жүргізілуін қам­тама­сыз етіп отыр. Шаруашылық бас­шысы Талғат Сұлтанов дала төсін­дегі диқандар­дың жұмысын үйлес­тіріп, өндірістік үдерістің тиімді ұйым­дастырылуына жіті көңіл бөледі.

Күріш өсірудің шебері атанған шаруашылықтың суармалы жерлерінің жалпы көлемі 730 гектарды құрайды, оның 247 гектары – күріш, 205 гектары – бидай, 278 гектары – көпжылдық шөптер. Егін жинауға екі комбайн, бір «КамАЗ» жүк көлігі, сондай-ақ «МТЗ-80», «МТЗ-1221» тракторлары тар­тылған. Бүгінгі күні 110 гектар кү­ріш орылып, орташа өнімділік гекта­ры­на шамамен 40 центнерді құрап отыр.

– Жер еңбекті жемейді. Сонау көктемнен басталатын тынымсыз ең­бектің өтеуі күзгі жиын-терімде кө­рінеді. Биылғы түсім жаман емес. Кө­ңіл тоғайтар өнімді ысырапсыз жи­нап алуға жұмысшылар білек сыбана кірі­сіп кетті. Бұл ұжымның бірлігі мен тынымсыз тірлігінің нәтижесін айғақ­тайды, – дейді шаруашылық басшысы.

Биыл Балқаш ауданындағы суармалы егістік жерлердің жалпы көлемі 27 мың гектардан асты. Оның ішінде 7 мың гектардан астам жерге күріш егілсе, 5 мың гектардан астамы – бидай мен арпа егісі. Қалған алқаптарға көкөніс, бақша, мал азықтық дақылдар өсірілген.

Шөп дайындау науқаны барысында 160 мың тоннадан астам пішен, 40 мың тоннадан аса сүрлем-шөп, ша­ма­мен 33 мың тонна сабан, 85 мың тонна сүрлем дайындалған. Дәнді дақыл­дардан жиналған өнім көлемі 9 мың тоннадан асып, орташа өнімділік гектарына 18 центнерді құрады. Қазіргі уақытта 6 мың гектардан астам күріш алқабы орылып, орташа өнімділік гектарына 42 центнерге жуықтады.

Күз мезгілі – дәстүрлі түрде ауыл шаруашылығы маусымының қоры­тындысын шығаратын уақыт. Балқаш ауданының береке мен молшылық­тың белгісіне айналған күріш өнімі – диқандардың тынымсыз еңбегі мен жоғары кәсіби шеберлігінің нәтижесі. Егіншілер өңірдің аграрлық саласын тұрақты дамытуға, азық-түлік қауіп­сіздігін нығайтуға елеулі үлес қосып келеді.

Алматы облысы,

Балқаш ауданы