Биыл Қарағанды облысында «Келешек мектептері» ұлттық жобасымен 10 мектеп салынады, деп хабарлайды 24KZ. Оның төртеуі облыс орталығында ашылады. Оңтүстік-Шығыс және Көгілдір тоғандар ықшамауданында салынған 2 мектеп білім күні пайдалануға беріледі. Қалғандары жыл соңына дейін халық игілігіне тапсырылады деп жоспарланған. Жаңа мектептерге бала саны көп мектептердің оқушылары ауысады.
«Кеңдала» ықшамауданында былтыр ашылған мына мектепте 2000 бала оқиды. Білім беру мекемесі «Келешек мектептері» ұлттық жобасымен салынды. Мұнда жақын маңдағы бала саны тым көп 4 мектептің оқушылары ауысып келді. Білім ошағында балаларға қолайлы жағдай жасалған. 4 спорт залы, зертханамен жабдықталған оқу бөлмелері бар.
Гүлдана Асамиданова, №19 жалпы орта білім беру мектебі директорының міндетін атқарушы:
- Балалар, мысалы, үшін сабақты түсінбей қалса, олар түстен кейін қалып, мұғалімдер олармен қосымша жұмыс атқара алады. Бұл басқа мектептерге қарағанда мүмкіншілігіміз. Себебі екі ауысымды мектептерде түстен кейін кабинеттер бос болмай қалады, балалардың отыратын орны болмай қалады. Ал бұл жерде оның барлығы қарастырылған.
1 қыркүйекте қалада осындай тағы екі заманауи мектеп пайдалануға беріледі. Жаз бойы білім бөлімінің мамандары оқу ордаларының құжатын рәсімдеп, оқушыларды қабылдаумен, ұстаздар ұжымын жасақтаумен айналысады. Тағы бір мектептің құрылысы тамыз айында аяқталып, жыл соңына дейін құжаттары рәсімделеді. Оған Ыбырай Алтынсарин атындағы үш ауысымдық мектептің оқушылары келеді.
Есентай Әшім, қалалық білім бөлімінің басшысы:
- Қаламыз Оңтүстік-Шығысқа қарай өсіп бара жатыр. Бұл жақта биік үйлер салынып жатыр. Жастар орналасқан. Бала өте көп. Бұлар енді катализатор сияқты жайлы мектептер. Төртеуі бірдей салынғаны жақсы болды. Біз оқу орны тапшылығы мәселесін шешіп жатырмыз.
Жалпы Қарағанды облысында жыл соңына дейін «Келешек мектептері» ұлттық жобасы аясында 10 білім ордасы салынады. «Бұл өңірдегі мектеп жетіспеушілігі мәселесін шешуге оң серпін береді», – дейді жауаптылар.
Авторлары: Руслан Нұрланұлы, Сайран Ақамбаев, Аман Хамит
