Басылым мәліметінше, компания жүзім дәнінің сығындысындағы қосылыстарға негізделген қартаюға қарсы препараттармен айналысады.
Шэньчжэнь қаласындағы Lonvi Biosciences биотехнологиялық стартапы өмірді 120 жасқа дейін ұзартуға мүмкіндік беретін дәрі әзірлеп жатыр, деп жазады inbusiness.kz сайты.
Стартап өкілдерінің айтуынша, олар ағзадағы сау клеткаларға зиян келтіретін қартайған клеткаларды жоя алатын ерекше молекула жасап шығарған.
Мақалада жүзім дәндерінің батыс мәдениетінде де, дәстүрлі қытай медицинасында да ежелден пайдалы тағам ретінде бағаланатыны айтылған.
Сонымен қатар, Lonvi Biosciences белсенді молекулалардың жоғары концентрациясы бар капсулаларды өндіру технологиясын дамытқан. Компания өз өнімдері салауатты өмір салты мен сапалы медициналық күтіммен ұштасқанда адамдардың 100–120 жасқа дейін өмір сүруіне ықпал етеді деп сенеді.
Бұған дейін қытайлық дәрігерлер алғаш рет әлемде робот көмегімен көз торының астына 4 200 шақырым қашықтықтан препарат енгізгені хабарланған еді.
Айта кетейік, Қазақстанда бүгінде 100 және одан да жоғары жастағы 448 адам тұрады. Ең қарт қазақстандық – Ұлытау облысының тұрғыны, биыл 115 жасқа толған.
