Қарағанды облысында археологтар сақ дәуіріне жататын жауынгердің бұзылмаған қабірін анықтады. Оның қасынан қола қылыш, жебе ұштары мен алтын сырға табылған, деп хабарлайды өңір әкімдігіне сілтеме жасаған KAZ.NUR.KZ.
Ведомствоның мәліметінше, бұл бірегей олжа биыл жазда Қарағанды облыстық тарихи-өлкетану мұражайының археологтары Ақтоғай ауданындағы Қарабие қорымын қазу кезінде табылған.
№1 қорғанның толығымен сақталғаны белгілі болды — мұндай жағдай сақ ескерткіштері үшін өте сирек кездеседі.
"Қабірдің жабынды тастарын алғаннан кейін, қаңқаны толық анатомиялық қалпында таптық. Оның оң қолында қылыш болды. Мұндай олжаға жолықпағанымызға көп жыл болды", — дейді мұражайдың жалпы тарих, археология және этнография бөлімінің меңгерушісі Даурен Жүсіпов.
Жерлеу біздің дәуірімізге дейінгі VII-VI ғасырларға жатады және ғалымдардың пікірінше, ол элиталық жауынгерлер өкіліне тиесілі. Ерекше назар аудартқаны – ұзындығы шамамен 30 сантиметр болатын қос жүзді тұтас құйылған қола акинак. Қару дала жыртқыш құстарының бейнелерімен өрнектелген.
"Мұндай пішіндегі және безендірудегі семсер Қазақстан аумағынан бұрын-соңды табылған емес. Бұл жәдігер сақ дәуіріндегі металл өңдеу ісі мен көркемдік талғамның жоғары деңгейін айғақтайды", — дейді археолог, тарих ғылымдарының кандидаты Арман Бейсенов.
Қылыштың жанынан археологтар бес металл жебе ұшын және алтын сырға тапқан. Алтын әшекей жауынгердің қоғамдағы жоғары мәртебесін айғақтайды. Заттардың көркемдік стилі Талды-2 қорымынан табылған "Алтын адам" жәдігерлерімен үндес.
Барлық табылған бұйым облыстық мұражайдың қорына тапсырылады. Ғалымдар ежелгі жерлеудің құпиясын ашу үшін металлографиялық, радиокөміртекті және антропологиялық зерттеулер жүргізуге дайындалып жатыр. Зерттеу нәтижесі келесі жылы қыста таныстырылады.
Археологиялық жұмыстар Қарағанды облысы әкімдігінің және облыстық Мәдениет, архивтер және құжаттама басқармасының қолдауымен жүргізілді.
Мәтіннен қате тапсаңыз, бізге жазыңыз
