Қызылорда облысында "Қызылорда Балық" кәсіпорнының басшылығына қатысты тергеу аяқталды. Олар кеден органдарына жалған мәлімет ұсынып, 75 тонна көксерке балығын заңсыз шетел асырған, деп хабарлайды KAZ.NUR.KZ Қаржы мониторингі агенттігінің баспасөз қызметіне сілтеме жасап.
ҚМА мәліметінше, 2022 жылы аталған кәсіпорынның лауазымды тұлғалары кеден органдарына жалған мәліметтер ұсынып, құны 254 млн теңге болатын жалпы салмағы 75 тоннадан асатын көк серке етін Еуропалық одақ елдеріне заңсыз экспорттаған.
"Балық өнімдерінің шыққан тегі заңды екенін көрсету мақсатында кәсіпорын шын мәнінде балық өсіру немесе ұстау жағдайлары болмаған тұлғалар мен шаруашылықтардан балық сатып алынғаны жөнінде жалған құжаттар ресімдеген.
Тексеру барысында бұл шаруашылықтардағы су айдындарының толықтай кеуіп қалғаны, ал құжаттарда көрсетілген жүк көліктерінің тасымалдау қызметін іс жүзінде атқармағаны және тоңазытқыш жабдықтармен қамтамасыз етілмегені анықталды.
Сонымен қатар тергеу барысында жалған шот-фактуралар жазылғаны және балық өнімдерін тасымалдауға заңсыз ветеринарлық анықтамалар берілгені дәлелденді", — делінген хабарламада.
Сот үкімімен кәсіпорынның құрылтайшысы және директоры кінәлі деп танылып, екі жыл мерзімге бас бостандығын шектеу жазасына кесілді.
Мемлекет пайдасына 254 млн теңге көлеміндегі заңсыз табыс өндірілді.
Сот үкімі заңды күшіне енген жоқ.
Мәтіннен қате тапсаңыз, бізге жазыңыз
