Қалалар мен ауылдарда қолданылатын көктайғаққа қарсы жаңа стандарт бекітілді.
Қазақстанда алғаш рет қалалар мен ауылдардың аумағында қолданылатын көктайғаққа қарсы материалдарға арналған ұлттық стандарт әзірленді. Бұл туралы Көлік министрлігі хабарлады.
Жаңа стандартты "Қазақстан жол ғылыми-зерттеу институты" (ҚазжолҒЗИ) дайындаған. Бұған дейін елде тек ГОСТ 33387-2015 стандарты қолданылып келген, алайда ол жалпы пайдаланымдағы автомобиль жолдарына ғана арналған болатын.
"Бұл құжат қалалық көшелердің, тротуарлардың, аялдамалар мен жаяу жүргіншілер өткелдерінің ерекшеліктерін ескермеген", – деп атап өтті ҚазжолҒЗИ мамандары.
Сарапшылардың айтуынша, ескі стандарт бойынша қолданылған реагенттер кейде тротуар жабындарын бүлдіріп, жарақат алу қаупін арттырған және адамдар мен үй жануарларының денсаулығына кері әсер еткен.
Оқи отырыңыз: Шымкентте жауыннан кейін асфальт опырылып, бірнеше көлік шұңқырға түсіп кетті
Сонымен қатар Экологиялық кодекстің 238-бабының 9-тармағына сәйкес, елді мекендер аумағында ас тұзын пайдалануына тыйым салынған, себебі ол топырақ пен өсімдіктерге зиян келтіреді. Жаңа стандарт қалалық ортаға қауіпсіз реагенттердің түрлері мен сапа көрсеткіштерін айқындайды. Оның енгізілуі қыс мезгілінде жол қауіпсіздігін арттыруға, сондай-ақ қоршаған ортаға залал келтірмей көктайғақпен күресуге мүмкіндік береді.
