Алматыда 13 адам қаза болған хостелдегі өртке қатысты жәбірленушілер мен сотталушылардың апелляциялық шағымы қаралды, деп хабарлайды Kazinform агенттігіне сілтеме жасаған KAZ.NUR.KZ.
Естеріңізге сала кетейік, биыл шілдеде бұл іс бойынша екі айыпталушыға сот үкімі шығып, олардың бірі – хостел директоры М. 5 жылға, компания иесі П. 4 жылға бас бостандығынан айырылған еді.
Агенттіктің жазуынша, апелляциялық отырыс кезінде адвокаттар өз қорғаушыларының кінәсіз екенін айтып, бірінші сатыдағы соттың үкімін жоюды сұраған. Олар сот алғашқы инстанцияда қорғаушы тараптың уәждерін ескерусіз қалдырғанын айтқан.
Ал прокуратура өкілі үкімді өзгеріссіз қалдыруды өтінген.
Барлық тараптың уәжін тыңдағаннан кейін сот мынадай шешім қабылдаған:
• Хостел директоры М.-ға қатысты үкім өзгеріссіз қалдырылған;
• П.-ға қатысты үкімнің тек моральдық өтемақы бойынша бөлігі өзгерген — жәбірленушілерге А. және А.-ға қатысты 7 миллион теңге төлеу туралы шешім күшін жойған.
Жәбірленушілердің азаматтық талабы қараусыз қалдырылған.
Алматыдағы хостелде болған өрт
2023 жылғы 30 қарашада таңғы уақытта Алматы қаласындағы Ади Шәріпов көшесінде орналасқан хостелден өрт шығып, салдарынан 13 адам қаза болды.
Кейін қалалық полиция департменті қаза тапқан барлық адамның жеке басы анықталғанын мәлім етті. Олардың тоғызы Қазақстан, екеуі Ресей, екеуі Өзбекстан азаматы екені белгілі болды.
Хостелдегі өрт фактісі бойынша қылмыстық іс тіркелді.
Сондай-ақ оқиғаға байланысты хостелдегі өрттің себептерін анықтап, зардаптарын жоюмен айналысатын үкіметтік комиссия құрылды.
Президент Қасым-Жомарт Тоқаев пен сол кездегі үкімет басшысы Әлихан Смайылов қайғылы жағдай кезінде қаза тапқан марқұмдардың туған-туыстары мен жақындарына көңіл айтты.
Кейін прокурорлар өрт оқиғасы бойынша қылмыстық істі тергеуге кіріскені, мекемені жалға беруші қамауға алынғаны хабарланды.
2024 жылғы қыркүйекте тергеу аяқталып, іс сотқа жіберілді.
Мәтіннен қате тапсаңыз, бізге жазыңыз
