Спорт комментаторы Исатай Мәди UFC-ден шығып қалған Азат Мақсұм туралы өз ойын айтты .
Бұл туралы Caravan.kz медиа порталы хабарлайды.
Спорт сарапшысы “Prommo Podcast” YouTube арнасында
”Азаттың UFC-ден кеткеніне 2 аптадай болды. Оған UFC-де менталитет жетпеген сияқты. Жасы 30-ға келіп қалса да, көрген-білгені, тәжірибесі әлі толыспаған сияқты. Төбелескен кезде бала сияқты болып көрінді. Ол UFC-ге келген кезде Тайсон Нэммен жақсы төбелесті. Қиын жекпе-жек болды. Бірақ Азат жеңгені көрініп тұрды. Бірақ әр жекпе-жек сайын Азатта деңгей төмендей берді. Байқағаным, оның бойынан агрессия, көзінен от көрінбейді. Сол нәрсеге қатты таң қалдым. Чарльз Джонсоннан ұтылды. Жарайды, ол кезде қателесті. Тагирге қарсы жекпе-жекте қысым болды, Хабибтың факторы болды деуі мүмкін. Қалай дегенмен Тагир топ 15-тегі жігіт. Жарайды дедік. Бірақ, Митч Рапосо деген UFC-дегі ең әлсіз спортшылардың бірі ғой. Тәкәппарлық көрсеткім келмейді. Дегенмен Митч Ропосо қайда, Азат қайда?! Азат оны 1-1,5 раундта шайнап өтетін адам болуы керек еді. Бірақ жекпе-жекте көргенім — нақты жоспар жоқ, хаус. Не істеді, не қылды? Төбелесінде ешқандай өзіндік ерекшелік жоқ. Мен қазір сынап отырған жоқпын, көрген нәрсемді айтып отырмын. Біз UFC-ге келген жастардың өскенін, дамығанын көреміз. Ал бұл жерде керісінше кері кеткенін көреміз. Джонсонға, Тагирге ұтылуға болады. Бірақ Ропосо дегендерге ұтылуға болмайды ғой. Ропосо да алысқа бармайды. Келесі жекпе-жегінде ұтылып, ол да UFC-ден кетеді”, — дейді ол.
Еске сала кетейік, қазақстандық аралас жекпе-жек шебері Азат Мақсұм UFC ұйымынан шығарылды. Ол қатарынан үш жекпе-жекте жеңіліп қалды.
30 жастағы спортшы кәсіби мансабын 2017 жылы бастаған. Ал UFC-де 2023 жылдан бастап өнер көрсетіп келді.
Ол UFC-дегі соңғы жекпе-жегін Абу-Дабиде өткен UFC 321 турнирінде өткізіп, америкалық төрешілердің бірауыздан шығарған шешімімен Митч Рапозодан жеңілді.
Осылайша, әлемнің ең беделді ұйымындағы қазақстандық файтердің көрсеткіші бір жеңіс және үш жеңіліс болып тіркелді.
