Футболдан UEFA Чемпиондар лигасы негізгі кезеңінің төртінші турында "Қайрат" клубы Италияның "Интер" командасынан жеңіліс тапты, деп хабарлайды Kazinform.
Алғашқы минуттардан-ақ алаң иелері басымдық танытты. Италиялық команда Темірлан Анарбеков қорғаған қақпа маңында жиі бой көрсетті. Десе де олар кей сәтте көздеген нысанадан мүлт кетті.
Ойын барысында негізінен алаң иелері шабуыл жасады. Арасында "Қайрат" ойыншылары да қарсы шабуылға шықты. Әсіресе Дастан Сәтпаев белсенді болды.
Ойынның 44-минутында "Интердің" аргентиналық шабуылшысы Лаутаро Мартинес гол соқты. Ал 56-минутта алматылық клуб өкілі Офри Арад бұрыштамадан әуелей көтерілген допты баспен Ян Зоммер қорғаған "Интер" қақпасына соқты. Өкінішке қарай 67-минутта италиялық клубтан Карлос Аугустоның алыстан тепкен добына Темірлан Анарбеков тосқауыл қоя алмады.
Осылайша алматылық команда 1:2 есебімен қарсыласынан жеңіліс тапты.
Айта кетерлігі, бұл ойынға дейін италиялық клуб тунирдегі үш ойында бірде-бір рет өз қақпасына гол жібермеген еді. Алдымен Нидерландтың "Аяксын" 2:0 есебімен жеңсе, одан кейін Чехияның "Славиясын" 3:0, Бельгияның "Юнион Сен-Жилуазын" 4:0 есебімен басып озды.
Ал "Қайрат" Португалияның "Спортингіне" 1:4, Испанияның "Реал Мадридіне" 0:5 есебімен есе жіберіп, Кипрдің "Пафосымен" 0:0 есебімен тең түсті.
Енді алматылық клуб алдағы ойынын 26 қарашада сырт алаңда Данияның "Копенгаген" командасына қарсы өткізеді.
Мәтіннен қате тапсаңыз, бізге жазыңыз
