ЖИ көмегімен жасалған видео жүздеген мыңнан астам қаралым жинаған.
Екібастұз қаласының әкімі Аян Бейсекин өзінің бейнесі жарнамада қолданылған киім дүкеніне барды, деп хабарлайды inbusiness.kz сайты.
Белгілі болғандай, киім дүкені жасанды интеллект көмегімен видео дайындап, онда шаһар басшысы басты кейіпкер ретінде бейнеленген. Бұл видео бір апта ішінде жүздеген мыңнан астам қаралым жинаған.
Аян Бейсекин бейнежазбаның астына "Сәлеметсіздер ме! Күрте алу үшін бару керек екен" деп әзілдеп, пікір қалдырған.
Кейін Екібастұз әкімі осы бутикке барған.
"Дүкенге барып, оның иесі Тұрарбекпен және оның креативті командасымен әңгімелестім. Әрине, дүкеннен құр қол кетпей, тауар сатып алдым, тегін емес. Қаламызда дамып жатқан жас кәсіпкерлерді қолдауға әрқашан дайынбыз", – деп жазды Аян Бейсекин Instagram парақшасында.
