Ұлытау облысында азаматтық қорғаныс қызметі мен коммуналдық мекемелердің қысқа дайындығы тексерілді. «Қыс – 2026» командалық-штабтық оқу-жаттығуында төтенше жағдайлардың алдын алу мен салдарын жою жұмыстары пысықталды.
Оқу-жаттығуда құтқарушылар, тәртіп сақшыларының, медицина мамандары мен коммуналдық қызметкерлердің жедел әрекет етуі және сапалы қызмет көрсетуі сыналды. Техникалардың сақадай сай болуы, жеке құрамның дайындық деңгейі, сондай-ақ эвакуация пункттерінің жай-күйі тексерілді.
Әбіл Оразов, облыстық ТЖ Департаменті басшысының орынбасары:
- Бүгін оқу-жаттығуға қатысқандар өз бағыты бойынша дайын екенін көрсетті. Жанармаймен қамтамасыз ету, техникалардың дайындығы, бәрі де тексерілді. Өңірдегі 44 эвакуация пункті тәулік бойы адамдарды қабылдай алады. Сондай-ақ жол қызметкерлерінің де әзірлігі пысықталды.
Қатысушыларға жүктелген тапсырма оңай болған жоқ. Олар далада адасып кеткендерді іздеу, қар құрсауында қалған жолаушыларды құтқару, коммуналдық апаттарды жою міндетін атқарып шықты. Мұндай іс-шаралар қызметкерлердің біліктілігін шыңдауға мүмкіндік береді. Ал оқыс оқиға кезінде техникалардың дайындығы маңызды рөл атқарады.
Мұрат Қарақойшы, облыстық ТЖД Төтенше жағдайларды жою бөлімінің бас маманы:
- Жалпы облыс бойынша бізде қысқы кезеңдерде төтенше жағдайларды жоюға 207 техника және 455 адам жұмылдырылатын болады. Бүгінгі таңда Ұлытау облысы бойынша көптеген жаңа техникалар сатып алынды. Жедел құтқару жасағына әр түрлі мақсатта қолданылатын қайықтар, гидроцикл, квадроцикл тағы да бес дана Тайота және де автоцистерналар сатып алынды.
Құтқарушылар жоғалған адамды іздеуде із кесетін иттерді алып шықты. Бұдан бөлек дрондарды да тиімді пайдаланып жүр. «Іздестіру-құтқару жұмыстары кезінде ұшқышсыз басқарылатын құрылғылардың көмегі көп», — дейді мамандар.
Авторлары: Асланбек Шығыр, Елизавета Шалина, Нұрлан Исмаилов, Гүлшахира Серекбаева
