Танымал италиялық басылым алматылық клубтың адуынды қарсылас екенін тілге тиек етіп, Дастан Сәтпаев жайлы сөз қозғады.
Италиялық танымал басылымдардың бірі La Gazzetta dello Sport "Қайрат" пен "Интер" арасындағы матч жайлы пікір білдірді.
"Миландықтар төрт ойында толық ұпай жинап, тек бір гол ғана жіберді. Ол — бүгінгі кеште Арад соққан доп. Бразилиялық пен аргентиналық капитанның голдары "Интерге" тағы бір жеңіс сыйлады.
Алматы — жер шарының бір түкпіріндегі кішкентай нүкте. Иә, ол Қазақстанда, Қырғызстан шекарасына жақын әрі Қытайдан да алыс емес. "Қайрат" шамамен 7 000 шақырымдық қашықтықты бағындырып, Миланға 8 сағаттан астам ұшып жетті. "Сан-Сирода" құрбандыққа шалынатын команда секілді қабылданғанымен, бәрі олай болмай шықты.
Қазақстандық команда осыған дейінгі кездесулердегідей қарсылық танытып, ұзақ уақытқа дейін төтеп берді. Тек соңында ғана әлсіреді. Дегенмен бұл жолы "Қайрат" қарсыласқа біраз қиындық тудырды. "Сан-Сирода" "Интерге" қарсы толық ойын бойы төтеп беру оңай емес. Тосын нәтижелер де тіркелді: кипрлік "Пафос" "Вильярреалды" жеңсе, әзербайжандық "Қарабах" "Челсимен" тең түсті. Бірақ бұл тізімге Қазақстан қосылмады.
"Джузеппе Меаццада" Кристиан Киву шәкірттері аса қатал емес алыптың кейпіне енді. "Интер" үлкен күш жұмсап, "ертегідегі Күлше қыз" — "Қайратты" жеңді. Лаутаро мен Карлос Аугустоның голдары "Интерді" Чемпиондар лигасының турнир кестесінің көшіне шығарды. Төрт ойын, төрт жеңіс.
Қазақ тілінде "Қайрат" сөзі "күш" не "ерлік" деген мағынаны білдіреді. Расымен де Уразбахтин жаттықтырған команда сол атқа лайық өнер көрсетті. "Интер" бірнеше мүмкіндікке и болғанына қарамастан, есепті тек бірінші таймның соңында аша алды.
Ең қауіпті сәтті алаңдағы ең жас ойыншы — 2008 жылы туған қазақстандық талант Дастан Сәтпаев жасады. Ол допты тартып алып, қақпаға бағыттаған соққысы көлденең бағанадан қайтты. Бекер емес. "Челси" оны жазда Лондонға алып келу үшін алдын ала 2,5 миллион еуро төлеген. Көп ұзамай Лаутаро Мартинес өз мүмкіндігін пайдаланып, есеп ашты. Апта басында Киву оған "көбірек күлімде" деп әзілдеп жазған. Бірақ хабарлама жеткізілмеген күйде қалды. Демек, Лаутаро оны оқымаған да, көрмеген де. Аргентиналық шабуылшы Чемпиондар лигасында тағы да шеберлігін көрсетті. Алайда гол соққаннан кейінгі қуанышы ызаға толы еді.
Екінші тайм басында "Интер" сенімді ойнап, Пио Эспозито арқылы шешуші соққы жасауға жақын болды. Бірақ көп ұзамай жағдай өзгерді. Бұрыштамадан кейін израильдік Офри Арад Дюмфрис пен Де Фрейдің ортасында кедергісіз баспен гол соғып, Зоммер қақпасын дәл көздеді. Миланға Қазақстаннан ұшып келген 1700 жанкүйер қуанышқа бөленді. Арад бұған дейін: "Егер “Қайрат” Сан-Сирода жеңсе, Алматыға автобуспен 75 сағат жүріп барамын" деп әзілдеген болатын. Мүмкін, бұлай болмағаны дұрыс та шығар.
Пио Эспозито кейін тамаша мүмкіндікті мүлт жіберді. Бірақ Карлос Аугусто дәл соққымен "Интерді" қайта алға шығарды. Осыдан кейін Киву жарақаттан айыққан Маркус Тюрамды алаңға шығарып, есепті еселейді деп үміттенді. Алайда қазақтар матч соңына дейін қауіпті ойын көрсетті.
Үш мәрте ысқырық соққан төреші Луиш Годинью үшін де, "Интер" үшін де бұл жеңілдік сәтіндей сезілді. Ойын қауіпті арнаға түсіп бара жатқан еді. Дегенмен ең бастысы — "Интер" Чемпиондар лигасының көшін жалғастыруда" деп жазады италиялық басылым.
