Әлеуметтік желі мен БАҚ беттерінде шегірткелердің жаппай әрі бақылаусыз таралуына қатысты ақпарат тарап жатыр. Ауыл шаруашылығы министрлігі бұл мәлімет пен бейнематериалдар шындыққа жанаспайтынын мәлімдеді, деп жазады Egemen.kz.
Министрлік ел аумағында шегірткелердің таралу көлемі 2,1 млн гектарға дейін жетуі мүмкін деп болжап отыр. Қазіргі уақытта 14 өңірде 596,3 мың гектар алқапта өңдеу жұмыстары аяқталған.
«Жұмыстар жоспарға сәйкес, штаттық режимде жүргізіліп жатыр. Оларды Ауыл шаруашылығы вице-министрлері, Агроөнеркәсіптік кешендегі мемлекеттік инспекция комитетінің өкілдері, сондай-ақ өңірлерде құрылған жедел штабтар бақылауда ұстап отыр. Ауыл шаруашылығы министрі Айдарбек Сапаров Жамбыл, Түркістан және Қызылорда облыстарындағы ахуалды жеке бақылауына алған», делінген министрлік хабарламасында.
Күрес шараларына 443 арнайы бүрку техникасы жұмылдырылып, зерттеу жұмыстарына 4 625 маман тартылған. Қажетті техника мен препараттар қоры жеткілікті.
АШМ жалған мәлімет үшін жауапкершілік көзделгенін еске салып, ресми дереккөздерге сүйенуге шақырады.
