Соңғы жылдары дәрігерлерге кальцийленген артериялық атеросклероз диагнозы қойылған науқастар жиі жүгіне бастаған. Мұндай жағдайда қан тамыры қабырғалары қатайып, икемділігін жоғалтады да, стандартты баллондық ангиопластикамен оларды кеңейту мүмкін емес. Соған байланысты қалалық кардиологиялық орталық кальцийленген артерияны емдеудің озық әдісін енгізді.
Әдетте артерия тарылған кезде емдеу үшін баллон қолданылады да, ол зақымданған тамыр бөлігіне енгізіліп, 10-14 атмосфералық қысыммен үрле уарқылы тамырды кеңейтіп, қанның жүруін қалпына келтіретін стент орнатуға мүмкіндік береді.
«Алайда айқын кальциноз кезінде жағдай әлдеқайда күрделі. Кальцийленген түйіншектің тығыздығы сондай, оны 20 атмосфераға дейінгі қысымда да кеңейту мүмкін емес, осылайша баллон толық ашылмай қалады. Мұндай жағдайда қысымды 30 атмосфера не одан жоғары деңгейге дейін арттырса, артерия жарылып кететіндіктен, бұл процедура өте қауіпті», дейді интервенциялық кардиология бөлімшесінің меңгерушісі Оразбек Сахов.
Медицинадағы мұндай мәселені жаңа технология – ультрадыбыстық литотрипсия қолдану арқылы шешуге болады. Процедура кезінде зақымданған аймаққа арнайы баллон енгізіледі. Баллон үрленген кезде оның ішінде ультрадыбыстық импульс түзіліп, ол кальцийленген түйіншекті бұзады. Толқын кальцийге бағытталған әсер етеді де, оның құрылымын бұзады, ал тамыр қабырғасының жұмсақ тініне зақым келтірмейді.
Мұндай өңдеуден кейін баллон қайта үрленіп, тамыр оңай кеңейеді, стент орнату қауіпсіз әрі тиімді атқарылады. Ультрадыбыстық литотрипсия артерияның жарылу қаупінсіз, жұмсақ әсер етуді қамтамасыз ететіндіктен, кальцийленген түйінді үгітіп, күрделі кальциноз кезінде де стентті сәтті орнатуға мүмкіндік береді әрі қан айналымын тез қалпына келтіреді.
«Біздің орталықта ультрадыбыстық литотрипсия әдісімен үш сәтті ота өткізілді. Барлық жағдайда артерия толық ашылып, стент еш қиындықсыз орнатылды. Пациенттердің жағдайы қанағаттанарлық, қан айналымы қалпына келді, ауырсыну белгілері жойылды», дейді Оразбек Сахов.
