Алматы облысы Қарасай ауданы Жібек жолы ауылындағы ұн өнімдерін шығаратын зауытта болған жарылыстан зардап шеккендер ауруханада көз жұмды, — деп хабарлайды Massaget.kz тілшісі.
Бұл туралы компанияның баспасөз қызметі мәлімдеді. Қайғылы оқиға құрама жем зауытында 23 мамырда болды. Сол кезде жарылыс салдарынан бір адам қаза тауып, төрт адам жараланғаны айтылды. Денелерінің 80-90 пайызын күйік шалған зардап шеккендер жансақтау бөліміне жатқызылды.
"Қайғылы оқиға салдарынан әріптестеріміз қаза тапқанын ауыр күйзеліспен, қайғыра отырып хабарлаймыз", — деп жазылған хабарламада.
Компания марқұмдардың отбасыларына, туған-туыстарына және жақындарына көңіл айтты.
"Жерлеу рәсімдерін ұйымдастыруға байланысты барлық шығынды компания өз мойнына алады. Сондай-ақ, марқұм болған әріптестеріміздің артында қарыздары болса, толық өтеледі", — деп жазылған хабарламада.
Қазір оқиғаның себептерін анықтау бойынша тергеу жұмыстары жүргізіліп жатыр.
Instagram парақшамызға жазылып, ең қызықты ақпараттарды бірінші болып оқыңыз!
