Университет көпсалалы спорт және ғылыми орталыққа айналады.
Туризм және спорт министрі Ербол Мырзабосынов елордадағы Ұлттық спорт университетінің құрылысы аяқталуға жақын екенін айтты, деп хабарлайды inbusiness.kz сайты.
"2025 жылдың 9 айында 35 спорт нысаны салынды. Жыл соңына дейін тағы 67 нысанның құрылысын аяқтау жоспарланған. Түркістан қаласында халықаралық деңгейдегі Ескек есу арнасының құрылысы аяқталды", – деді Ербол Мырзабосынов.
Оның сөзінше, бұл нысан есу және академиялық есу спорттарын, сондай-ақ туризмді дамытуға мүмкіндік береді.
"Елордада Ұлттық спорт университетінің құрылысы аяқталуға жақын. Университет тек оқу орны ғана емес, сонымен бірге көпсалалы спорт және ғылыми орталық болады. Бұл еліміздің спорт индустриясының дамуына және өңірлік әрі халықаралық ынтымақтастықтың нығаюына ықпал етеді. Нысанды пайдалануға беру 2025 жылдың желтоқсанында жоспарланған", – деп атап өтті министр.
