Нигерия айыптауларды жоққа шығарды.
АҚШ президенті Дональд Трамп Нигерияға әскери күштерді жіберуі мүмкін екенін ескертті. Ол Нигерия үкіметі христиандарды өлтіруді жалғастыра берсе, осындай қадамға баратынын айтты. Бұл туралы Ақ үй басшысы Truth Social әлеуметтік желісінде жазды, деп хабарлайды inbusiness.kz сайты DW агенттігіне сілтеме жасап.
"Егер Нигерия үкіметі христиандарды өлтіруін жалғастыра берсе, АҚШ Нигерияға көрсетілетін көмекті дереу тоқтатады және осы елге қару-жарақпен кіріп, бұл сұмдық қылмыстарға барған исламдық лаңкестердің көзін жоюы мүмкін. Мен қорғаныс министрлігіне ықтимал әрекеттерге дайындалуды тапсырамын. Шабуыл жасайтын болсақ, ол жылдам әрі қатал болады", – делінген жазбада.
Кейін Пентагон басшысы Пит Хегсет Дональд Трамптың сөзіне қосылды.
"Нигерияда және басқа да елде бейкүнә христиандардың өлтірілуі дереу тоқтауы тиіс. Министрлік әрекет етуге дайындалып жатыр", – деді ол.
Нигерия президенті Бола Тинубудың сөзінше, дін бостандығы елдегі басты қағидаттың бірі болып қала береді.
Биылғы наурыз айында АҚШ Конгресінің мүшесі Крис Смит Мемлекеттік департаментті Нигерияны "ерекше алаңдаушылық туғызатын елдер" тізіміне қосуды ұсынған болатын. Қазан айының басында сенатор Тед Круз бен Өкілдер палатасының мүшесі Райли Мур Нигерия үкіметін христиандарға жасалып жатқан жаппай қырғындарға көз жұма қарап отыр деп айыптады.
