Көкшетауда жылу трассасының қаптамасы жанып, от қасында тұрған тұрғын үйге ауысты. Құтқарушылар тұрғындарды эвакуациялады, деп ТЖМ баспасөз қызметіне сілтеме жасаған KAZ.NUR.KZ хабарлайды.
Төтенше жағдайлар министрлігінің ресми Telegram-каналындағы ақпарат бойынша, оқыс оқиға Көкшетау қаласының Саин көшесінде орын алған. Белгілі болғандай, жылу трассасының қаптамасы жанып, от бірінші және екінші қабаттағы пәтерлердің балкондарына ауысқан.
ТЖМ өрт сөндіру бөлімшелері жедел түрде шақыру орнына келді. Келген соң жоғарғы қабат тұрғындарына қауіп төніп тұрғаны анықталды.
"Өрт сөндірушілер дереу адамдарды эвакуациялауға кірісті. Құтқарушылардың батыл әрі кәсіби әрекеттерінің арқасында түтінді кіреберістен 12 адам, оның ішінде 2 бала эвакуацияланды", — делінген министрлік хабарламасында.
ТЖМ өкілдерінің хабарлауынша, өрттің көрші пәтерлерге таралуына жол бермей, қысқа мерзімде сөндірілді.
Мәтіннен қате тапсаңыз, бізге жазыңыз
