"Тенгри Инвест" ЖШС және Алматы әкімдігі қаладағы ипподром аумағында тұрғын үй кешені салынады деген ақпаратты жоққа шығарды, деп хабарлайды Zakon.kz.
Компанияның хабарлауынша, әлеуметтік желілер мен кейбір БАҚ-та тараған тұрғын үй кешені салынады деген қауесет негізсіз.
"Тарихи ипподром аумағында ешқандай құрылыс жұмыстары жүргізіліп жатқан жоқ. Сондай-ақ тұрғын үй немесе коммерциялық нысандар салу жоспары да жоқ. Ипподром бұрынғыдай жұмыс істеп тұр, онда ат спорты жарыстары өткізіліп, ұлттық спорт түрлерін дамыту ісі жалғасып келеді", — деді "Тенгри Инвест" ЖШС директоры Ержан Майлыбаев.
Алматы әкімдігі де бұл ақпаратты теріске шығарды.
"Егжей-тегжейлі жоспарлау жобасына сәйкес, аталған аумақ ипподром ретінде бекітілген, ал оны бұзу немесе өзге мақсатта пайдалану жөнінде ешқандай рұқсат берілген жоқ", — деп мәлімдеді әкімдік.
Айта кетейік, Алматы ипподромы – еліміздің ең көне спорт нысандарының бірі. Мұнда дәстүрлі түрде ат спорты жарыстары мен ұлттық мәдениетті насихаттайтын ірі қоғамдық шаралар өткізіліп келеді.
