Енді әлеуметтік желідегі әрбір сөзің оқу визасын алуға тікелей әсер етеді .
АҚШ Президенті Дональд Трамптың әкімшілігі үміткерлердің әлеуметтік желілерін тексеруді кеңейту мәселесін қарастырып жатқандықтан АҚШ-та студенттік виза алу үшін жаңа сұхбаттарды уақытша тоқтатуды бұйырды, деп хабарлайды inbusiness.kz сайты Рейтерс агенттігіне сілтеме жасап.
Тексерістерді енгізуге дайындық аясында әкімшілік АҚШ елшіліктері мен консулдықтарына студенттік визаға үміткерлермен әңгімелесу шараларын тоқтатты. Тиісті жеделхатқа 27 мамыр, сейсенбі күнгі АҚШ Мемлекеттік хатшысы Марко Рубио қол қойған.
Трамп әкімшілігі әуелі оқуға ниетті азаматтардың әлеуметтік желісін барынша тексеруді қарастырып жатыр. Консулдық қызметкерлер Instagram, X және TikTok сияқты платформаларда жарияланған жазбалардан бастап, желіде қалдырған пікірлерін де назарға алмақ.
Бірақ, тексеріс қалай жүргізілетіні белгісіз. Енді мұхит асып АҚШ-қа арман қуып барған әр студентке әлеуметтік желісі арқылы баға берілетін болады. Шетелдіктерге қарсы қатаң шаралар Гарвардпен туындаған дау-дамайдан кейін күшейе түскен.
Трамп көне университетке қысымды арттырып, тағы да 100 млн долларлық қаржылық қолдаудан айырып отыр.
