Құтқарушылар 15-қабаттан секіргелі тұрған бойжеткенді аман алып қалды.
Астана қаласының Байқоңыр ауданында құтқарушылар өз-өзіне қол жұмсамақ болған қызды дер кезінде құтқарып қалды, деп хабарлайды ТЖМ баспасөз қызметі.
Оқиға Шолпан Иманбаева көшесіндегі көпқабатты үйдің 15-қабатында болған. Төтенше жағдайлар департаментінің мәліметінше, тұрғындар жас қыздың терезе сыртында тұрғанын көріп, жедел қызметке хабар берген.
"Құтқарушылар оқиға орнына дереу жетіп, көрші пәтердің терезесі арқылы бойжеткенге жақындаған. Дәл секіргелі тұрған сәтте құтқарушы қызды ұстап үлгеріп, пәтер ішіне кіргізді", – делінген ТЖД хабарламасында.
1999 жылғы туған қыз аман қалды. Қазір оның жағдайы дәрігерлер мен психологтардың бақылауында. Оқиға куәгерлері құтқару сәтін видеоға түсіріп, әлеуметтік желілерде бөлісіп жатыр. Кадрларда тұрғындардың бәрі алаңдап, ал қыз құтқарылған сәтте халықтың ду қол шапалақтап алғыс білдіргені көрінеді.
Оқи отырыңыз: Құтқарушылар Алматы тауларында адасқан туристерді эвакуациялады
