Димаш Құдайберген Алматыда өткен D and Dears фан-кездесуінде спортзалда "Балқадиша әнін" айтып, желі жұлдызына айналған дзюдошы баланы сахнаға шығарып, құрмет көрсетті, деп хабарлайды KAZ.NUR.KZ.
"Әлеуметтік желіде өз талантымен танылған 14 жастағы Иса Бекболатқа Димаш Құдайберген қолдау білдіріп, бүгінгі концертінде сахнада өнер көрсетуге мүмкіндік берді. Көрермендер жас талантты ыстық ықыласпен қарсы алды", — делінген Jibek Joly телеарнаның Instagram-дағы парақшасында жарияланған видео сипаттамасында.
Ерекше дауысымен желі қолданушыларының сүйіспеншілігіне бөленген, Иса Бекболат халықтың алдына шығып, үлкен сахнада "Балқадиша" әнін тағы бір рет орындаған.
Ал Димаш жас талантты сахнаға шығарып қана қоймай, қолтаңбасы қойылған домбыраны да сыйға тартқан.
Желі қолданушылары Димаштың көрегендігіне, парасаттылығына тәнті болып, жылы лебіздерін жазып жатыр.
"Керемет! Иса батырға қолдау көрсетіп сахнаның төріне шығарған Димаштайға мың алғыс! Керемет кездесу болды", "Исаның дауысы қандай керемет! Димаш ағасының сыйға тартқан домбырасы, шыңға шығарсың!", "Міне нағыз, қазақылық, ағалық деген! Осындай ағалары тұрғанда інілерінің қанаттары биікке самғайды!", "Дауысы қандай таза! Өнерің өрлей берсін, балақай!", "Даусы неткен жағымды! Балақай бағың жансын. Димаштай ағаң қолдағанда неге әлемге танылатын әнші болмасқа, ақ жол!" — дейді олар.
Азаттық рухының жазуынша, Атырау қаласында тұратын Бекболат Иса жаттықтырушысымен бәстесіп, жеңіліп қалған. Сондықтан жаттықтырушысы спорт залда, жаттығудан кейін "Балқадиша" әнін айтқызған. Есесіне, жезтаңдай бала TikTok желісінде бір сәтте-ақ танымал болып шыға келген.
