Жамбыл облысында Шу аудандық соты көршісіне қасақана ауыр дене жарақатын салғаны үшін айыпталған ер адамның ісін қарады. Бұл туралы Жамбыл облысының сотына сілтеме жасаған KAZ.NUR.KZ хабарлайды.
Іс материалдарына сәйкес, 2025 жылдың қыркүйегінде Шу ауданының Төле-би ауылында екі көршінің арасында жанжал туындаған. Біреуі екіншісіне уақытша құрылыс құралдарын беруден бас тартып, соңы ұрыс пен төбелеске ұласқан.
"Сотталушы Д. үстелде жатқан пышақты ұстап алып, Б.-ның іш тұсына бір рет соққы жасады. Жәбірленуші ауыр дене жарақатын алып, Шу қалалық ауруханасына жеткізілді", — делінген сот хабарламасында.
Сотталушының кінәсі тараптардың айғақтарымен, сараптамалардың қорытындыларымен, заттай дәлелдемелермен және істің басқа материалдарымен дәлелденді.
Прокурор сотталушыға 3 жылға бас бостандығынан айыруды сұрады. Сотталушы кінәсін толық мойындап, жасаған ісіне өкінді. Жәбірленуші сотталушыны кешіргенін және оған ешқандай талап жоқ екенін айтты.
"Сот кінәні мойындауды, шын жүректен өкінуді және жәбірленушінің кешірімін жеңілдететін мән-жайлар ретінде анықтады. Ауырлататын мән-жайлар ретінде сот қылмыстық құқық бұзушылықты алкогольдік масаң күйде жасағанын анықтады", — делінген хабарламада.
Сотталушы ҚК-нің 106-бабының 1-бөлігі бойынша кінәлі деп танылып, оған 3 жыл бас бостандығынан айыру жазасы тағайындалды. ҚК 63-бабын қолдана отырып, тағайындалған жаза шартты деп танылды.
Үкім заңды күшіне енді.
Мәтіннен қате тапсаңыз, бізге жазыңыз
