Танымал дәстүрлі әнші Наркенже Серікбаева әлеуметтік желідегі жазбасымен жұрттың жүрегін елжіретті, деп хабарлайды Skifnews.kz ақпарат порталы.
Өнер иесі анасын сағынышпен еске алып, жүректен шыққан сөздерімен көпшілікті толқытты.
«Мама, қалайсыз? Сізбен осылай амандаспағалы 1 жарым жылдан асыпты. Дауысыңызды естімегелі де біраз болды. Сіз менің сарқылмас байлығым, өмірдегі ең жақыным, сырласым, мұңдасым едіңіз... Менде бәрі бар, шүкір, бірақ сіз жоқсыз. Сіз ғана жетпейсіз маған...» — деп жазды әнші.
Наркенженің жазбасынан аналық мейірімге деген сағыныш, ананың жоқтығын сезінудің ауырлығы анық аңғарылады. Ол өткен күннің жылулығын, анасымен болған әр сәттің қадірін еске алып, көпшілікке де ой салды.
«Мама, сіздің орныңыз қатты білінеді. Біреулер сынап, біреулер мақтаған сәттерде сіздің сөзіңіз, дұғаңыз жетіспей тұрды. Саяшыңды ұзаттық, қуанышты күндер өтті, бірақ сол тойда сіз ғана болмадыңыз. Мұхамеджаным 5 жасқа, Хадиям 4 жасқа қадам басты. Көлігімнің артында бірге отырушы едіңіз, қазір сол орын бос...» — деп жазды әнші.
Өнер иесі жазбасын көпшілікті тебіренткен мына сөздермен аяқтады:
«Мен сізді сағындым, мама... Аналарыңыздың қадірін біліңіздер. Қасында көбірек жүріңіздер, шай ішіп, сөйлесіп, сырласыңыздар. Анасы бар адамдар қандай бақытты!»
Желі қолданушылары Наркенженің шынайы эмоцияға толы жазбасын жылы қабылдап, пікір қалдырып, аналар туралы естеліктерімен бөлісті. Көпшілігі «жүрекке тиді», «жылап оқыдым», «ананың орнын ешкім баса алмайды» деп жазып, әншіге жұбату сөздерін арнады.
