Үш соққы нәтижесінде 14 есірткімен айналысқан террорист жойылды.
АҚШ Қорғаныс министрі Питер Хегсет Тынық мұхитында есірткі тасымалдауға қатысы бар деп күдікке ілінген төрт кемеге соққы жасалғанын, салдарынан 15 адамның 14-і қаза тапқанын мәлімдеді, деп хабарлайды inbusiness.kz сайты.
Министр бұл туралы америкалық X әлеуметтік желісінде жазып, Тынық мұхитында АҚШ-қа ірі көлемде есірткі жеткізбек болған кемелердің атқыланған сәті түсірілген бейнежазбаларды жариялады.
Хегсет мәлімдемесінде шабуылдар АҚШ президенті Дональд Трамптың бұйрығымен жүзеге асқанын атап өтті.
"АҚШ Қорғаныс министрлігі Тынық мұхиттың шығыс бөлігінде есірткі тасымалымен айналысқан және террористік ұйымдардың бақылауында болған төрт кемеге соққы берді", – деді министр.
Оның айтуынша, аталған кемелер барлау қызметінің бақылауында болған және олар есірткі тасымалының белгілі бағыттарымен жүзіп отырған.
Хегсет шабуылдың халықаралық суларда өткенін және америкалық әскерилер арасында шығын болмағанын мәлімдеді.
"Үш соққы нәтижесінде 14 есірткімен айналысқан террорист жойылды, бір адам тірі қалды", – деді ол.
Министрдің сөзінше, бұл операция АҚШ-тың өз шекарасының қауіпсіздігін қорғауға бағытталған жаңа кезеңнің бастауы.
"АҚШ Қорғаныс министрлігі 20 жылдан астам өзге елдердің жерін қорғап келді. Енді біз өз отанымызды қорғауға кірістік", – деді Хегсет.
Ол сондай-ақ бұл топ мүшелері елге есірткі кіргізу арқылы "Аль-Каида" ұйымынан да көп америкалықтың өмірін қиғанын, сондықтан оларға қарсы дәл сондай деңгейдегі шаралар қолданылатынын атап өтті.
