ҰҚК Сыбайлас жемқорлыққа қарсы іс-қимыл қызметі Түркістан облысының бірқатар жергілікті атқарушы органдары басшыларына қатысты сотқа дейінгі тергеулер жүргізіп жатқанын мәлімдеді, деп хабарлайды KAZ.NUR.KZ ведомствоның ресми сайтына сілтеме жасап.
Ведомство мәліметінше, қызметкерлердің еңбегіне ақы төлеуге бюджеттен бөлінген 191 млн теңгені өзінің қоластындағы адаммен сөз байласып ұрлады деген күдікпен Қоғамдық даму басқармасының басшысы тергелуде.
Сондай-ақ Ветеринариялық қызмет басқармасы басшысының қаржы-шаруашылық қызметін тексеру нәтижелері бойынша оң қорытынды шығарғаны үшін комиссия өкілдеріне 16 млн теңге мөлшерінде пара беру фактісі бойынша іс тіркелді.
Соттың санкциясымен аталған тұлғалар қамауда отыр.
ҰҚК Сыбайлас жемқорлыққа қарсы іс-қимыл қызметі өкілдері Қылмыстық-процестік кодекстің 201-бабына сәйкес өзге ақпарат жария етілмейтінін айтты.
Мәтіннен қате тапсаңыз, бізге жазыңыз
