Бұл туралы ағылшынның The Chelsea Chronicle басылымы хабарлады.
Лондондық клуб Сәтпаевты әуелі Францияның "Страсбург" клубына жалға беруді жоспарлап отырған көрінеді, деп жазады inbusiness.kz сайты.
Демек, жас талант "Қайраттан" кеткеннен кейін бірден "Страсбургке" ауысуы ықтимал. 2026 жылы 18 жасқа толған соң Дастан бірден "Челсидің" қатарын толықтыруы тиіс болатын. Қазірдің өзінде футболшының трансферлік құқығы толығымен лондондық клубқа тиесілі болып тұр.
Спорт сарапшыларының арасында Сәтпаевтың "Страсбургте" доп тебуін "өте дұрыс қадам" деп есептейтіндер бар. Десе де, "ағылшындық клуб Дастанға сенбей отыр" деп топшылайтындар да табылады.
– Ол "Қайраттан" кеткен соң бірден "Страсбурге" жалға берілуі мүмкін. Бұған дейін бұл клубта "Челсидің" Сантос, Кендри Паэс және Майк Пендерс секілді жас таланттары да ойнаған еді. Кейін олардың барлығы "Стэмфорд Бридждегі" негізгі құрамға қосылу мүмкіндігіне ие болды, – деп жазды ағылшын басылымы.
Еске салайық, Дастан Сәтпаев – 17 жастағы қазақстандық шабуылшы. Ол небәрі 16 жасында "Челсиге" шақырту алып, қазақ футболына үлкен өзгерістер алып келді. Қазіргі уақытта футболшы "Қайрат" құрамында Чемпиондар лигасының жалпы кезеңінде ойнап жатыр.
Кеше ғана "Қайрат" үшін маңызды голды соғып, клубын Қазақстан чемпионы атануына өз септігін тигізді.
