« QazaqGaz » ҰК» АҚ басқарма төрағасы Әлібек Жамауов Қашаған кен орнында салынып жатқан қуаты жылына 1 млрд м³ болатын газ өңдеу зауытының (ГӨЗ) құрылыс алаңына барып, жобаның орындалу барысын тексерді.

Инспекцияға бас мердігер – «Kazakh Construction Group» ЖШС және оның акционері «Integra Construction KZ» ЖШС өкілдері қатысты.

Мердігер ұйымдар құрылыс-монтаж жұмыстарының ағымдағы жағдайы мен жыл соңына дейін жоспарланған көрсеткіштер туралы баяндады. KCG бас директоры Нұрлан Жалбыровтың айтуынша, жобаны уақытында аяқтау үшін қосалқы мердігерлер мен жұмысшылар саны арттырылуда.

«Қазіргі таңда іргетастарды бетондау, технологиялық жабдықтарды орнату, инженерлік және сыртқы желілерді тарту, сумен жабдықтау және кәріз жүйелерін жүргізу жұмыстары жүріп жатыр. Сонымен қатар, металл конструкцияларын орнату және сырлау процесі белсенді түрде жүргізілуде. Түнгі ауысымдағы жұмысшылар санын көбейтіп, құбыр монтажы мен электр жүйесін орнату бойынша қосымша мердігерлерді тарту жұмыстарын жалғастырып жатырмыз», – деді ол.

Әлібек Жамауов өз кезегінде құрылыс қарқынын арттыруды, өндірістік процестердің орындалуын үнемі бақылауда ұстауды және ең бастысы – өнеркәсіптік пен өрт қауіпсіздігі талаптарын қатаң сақтауды тапсырды.

Анықтама: Бүгінде құрылыс алаңында 2000-нан астам маман еңбек етуде, оның ішінде 1423-і тікелей жұмысшылар. Түнгі ауысымда шамамен 194 қызметкер жұмыс істейді. Нысанда 331 бірлік техника тартылған. Ерекше назар қауіпсіздік шараларына, әсіресе түнгі ауысым кезінде, бөлінуде.

Құрылыс-монтаж жұмыстарының барысы:

  • Түтін құбырларын орнату толық аяқталды;
  • Іргетастарды бетондау, металл конструкцияларын және қызмет көрсету алаңдарын монтаждау, сырлау, технологиялық жабдықтарды орнату, сондай-ақ РВС-5000 және 600 м³ сыйымдылығы бар сфералық резервуарларды жинау жұмыстары жүріп жатыр;
  • Сыртқы инженерлік желілердің құрылысы (НВК-2) жалғасуда;
  • GPCI вахталық қалашығында әкімшілік-тұрмыстық кешен мен 140 және 132 орындық жатақханаларда шатыр монтажы аяқталып, ішкі әрлеу және электромонтаж жұмыстары жүргізілуде.

Негізгі көрсеткіштер:

  • Іргетастарды бетондау – 55 588 м³ (73,3%)

  • Металл конструкцияларын монтаждау – 5 081 тонна (25,1%)

  • Механикалық жабдықтарды орнату – 4 415 тонна (45,3%)

  • Резервуарларды монтаждау – 1 682 тонна (62,2%)

  • Жерасты құбырларын төсеу – 21 208 метр (48,8%)

Іссапар аясында Әлібек Жамауов Атырау облысындағы Eskene сұйытылған газ (LPG) терминалының құрылыс алаңында да болды. Бұл нысан аймақ үшін маңызды әлеуметтік-экономикалық жоба болып саналады және іске қосылғаннан кейін өңірдің газ тасымалдау инфрақұрылымының негізгі буынына айналмақ.