Еліміздің энергетикалық жүйесі штаттық режимде жұмыс істеп тұр.
2029 жылға дейін жаңа 6,7 ГВт қуат көздерін іске қосу жоспарланып отыр. Бұл туралы Энергетика министрі Ерлан Ақкенженов Үкімет отырысында айтты, деп хабарлайды inbusiness.kz сайты.
"Жалпы еліміздің энергетикалық жүйесі штаттық режимде және Ресей мен Орталық Азия елдерінің энергетикалық жүйелерімен қатар жұмыс істеуде. 237 электр станциясы, оның 79 дәстүрлі генерация көздері, қалған 158 жаңартылатын энергия көздерінен тұрады. Министрлік энергетикалық қауіпсіздікті нығайтуға, инфрақұрылымды жаңғыртуға, қуаттарды кеңейтуге және цифрлық шешімдерді енгізуге бағытталған тұрақты негізде шаралар қабылдауда. 26 ГВт-тан астам жаңа өндіруші қуаттарды 2035 жылға дейін енгізуді көздейтін жоспар аясындағы жұмыс белсенді түрде жалғасып жатыр", – деді министр.
Оның айтуынша, жаңа қуаттарды іске қосу қолданыстағы станцияларды жаңғырту арқылы және жаңа нысандарды салу арқылы да жүзеге асырылады. Өткен жылы 771 МВт жаңа қуат іске қосылды, оның 608 МВт – дәстүрлі, ал 163 МВт – жаңартылатын энергия көздері.
"Жалпы 2029 жылға дейін жаңа 6,7 ГВт қуат көздерін іске қосу жоспарлануда. Мәселен, 2025 жылы 621 МВт іске қосу жоспарланған, оның ішінде 166 МВт дәстүрлі, ал 455 МВт – жаңартылатын энергия көздері. Бүгінгі таңда 370 МВт іске қосылды, оның ішінде 216 МВт – жаңартылатын энергия қуаты. Жылдың соңына дейін 251 МВт іске қосылады. 2026 жылы шамамен 2 600 МВт қуаттылықты, оның ішінде жиынтық қуаттылығы 174 МВт жаңартылатын энергия объектісін енгізу жоспарланып отыр. 2027 жылы қуаттылығы шамамен 1 500 МВт, оның ішінде қуаттылығы 573 МВт болатын жаңартылатын энергия объектісін іске қосу жоспарлануда", – деді Ерлан Ақкенженов.
Бұдан басқа 2028 жылы 2 000 МВт-тан астам қуаттылықты, оның ішінде 245 МВт жаңартылатын энергия объектісін іске қосу жоспарланған.
Ведомство басшысының сөзінше, 2029 жылы экономиканың электр энергиясына деген барлық қажеттілігін жабу және энергия жүйесін профицитпен қамтамасыз ету күтілуде, бұл елдің экспорттық әлеуетін арттыруға мүмкіндік береді.
