Сот шешімі бойынша, баспалдақтың тек төменгі 3-4 текпішегі бұзуға жатады.
Бүгін Алматыда "Адем" сауда үйінің бірқатар кәсіпкері "Алматы паркинг" ЖШС-мен арада туындаған мәселеге байланысты журналистермен кездесіп, өз алаңдаушылығын білдірді.
Қазіргі таңда Сауда үйі ғимаратының кіреберісін ішінара бұзу туралы сот шешімі шыққан. Сәйкесінше, "Алматы паркинг" ЖШС-не тиесілі тұрақ алаңына еніп кеткен баспалдақтың төменгі 3-4 текпішегі бұзылуы тиіс. Алайда, кәсіпкерлер бұл олардың кәсібінің тұралауына және тұрақты клиенттер санының азаюына әкеледі деп алаңдап отыр.
Еске салайық, саудагерлер мен Алматының автотұрақ операторының арасындағы дау біраз уақыттан бері жалғасып келеді. Сауда үйінің тұрақ алаңы "Алматы паркинг" ЖШС меншігіне екі жыл бұрын ғана өткен. Ал 2002 жылы сауда үйінің ғимараты салынған кезде оның кіреберісі мен баспалдағы ішінара осы аумақта салынған. Сол уақыттан бері оған қатысты ешқандай дау болмағанымен, "Алматы паркинг" ЖШС тұрақ аумағын кеңейту және жаңа тұрақ орындарын жасау мақсатында баспалдақ пен кіреберіс тұрған жерді босатуды талап етіп отыр.
"Қазіргі таңда "Алматы паркинг" біздің кіреберіс орналасқан жерді қажет етуде. Егер кіреберіс бұзылатын болса, оның зардабын бірқатар кәсіпкер тартқалы отыр. Ал біз 200-ден астам кәсіпкерміз. 23 жыл ешкімге кедергі келтірмеген кіреберіс қазір қажетке ие болып қалғаны ма", – деді "Адем" сауда үйінен сауда орнын жалға алып отырған Ирина Искакова.
Дегенмен, "Алматы паркинг" ЖШС өкілдері бұл мәселеде заңды жолмен, яғни сот шешіміне сәйкес әрекет етіп отырғанын алға тартты. "Алматы паркинг" ЖШС директорының орынбасары Талант Тайыновтың түсіндіруінше, қолдарында кіреберістің ішінара тұрақ алаңында бой көтерілгенін растайтын және оны бұзу туралы шыққан сот шешімі де бар.
"Сот шешімі бойынша бұрынырақ "Адем" сауда үйінің аумағында емес, тұрақ алаңында салынған металл құрылыстар бұзылуы қажет", – деді Талант Тайынов.
Оның сөзінше, бұған дейін де тұрақ алаңында салынған металл құрылыстарды бұзу арқылы 30 жаңа тұрақ орны жасақталған.
Айта кетейік, бұған дейін екі арадағы дау Жетісу ауданының әкімдігінде бірнеше рет талқыланып, медиативті жолмен шешілген болатын. Алайда, қазір дау қайта күш алып, кәсіпкерлерді әбігерге салып отыр.
Биыл маусымда "Алматы паркинг" ЖШС "Адем" сауда үйінің алдындағы 30 нысан бұзылғанын және "Ялян" базарының алдындағы осындай 37 сауда нүктесін бұзу жұмыстары жүріп жатқанын хабарлаған болатын.
"Мониторинг барысында бұл нысандарды заңсыз сауда жасалы жатқаны анықталды. Оның ішінде газ балонын қолдану арқылы көпшілікке тамақ пісіретін орындар да бар. Бұл тұрақ алаңын пайдалану ережелеріне қайшы және адамдардың денсаулығына қауіп төндіреді", – деген болатын компания өкілдері.
Оқи отырыңыз:
С парковок рынков Алматы убирают незаконные торговые точки
