"Алматы – Өскемен" автожолында жарықтандыру жүйесі іске қосылды. Енді Талдықорғанға барар жол жарық әрі қауіпсіз болды, деп хабарлайды "ҚазАвтоЖолға" сілтеме жасаған KAZ.NUR.KZ.
Ұлттық компанияның мәліметінше, республикалық маңызы бар "Алматы – Өскемен" автожолының (253-254 шақырымында) 3-ші бөлімше елді мекенінен қалаға кіреберіс аралығындағы учаскесінде заманауи жарық бағаналары орнатылған.
"Жарық жүргізушілерге түнде тек жайлылық қана емес, сонымен қатар жол апаты қауіпін айтарлықтай төмендетуге сеп болмақ.
Бұл – ел бойынша автожолдарды қауіпсіз әрі жайлы ету жолындағы тағы бір қадам", — делінген хабарламада.
Биыл жолшылар "Сарыөзек – Көктал", "Талдықорған – Үшарал" және "Қонаев – Талдықорған" бағыттарындағы учаскелерде жарық жүйелерін монтаждау жұмыстарын жүргізіп жатыр. Барлық жұмысты 2025 жылғы 15 желтоқсанға дейін аяқтау жоспарланған.
Мәтіннен қате тапсаңыз, бізге жазыңыз
