Қазақстан Республикасы күніне орай "Астана Опера" театрында ҚР Мәдениет және ақпарат министрі Аида Балаева беделді халықаралық байқаулардың жүлдегерлерімен кездесті, деп хабарлайды inbusiness.kz сайты.
Кездесуге қатысушылар қатарында Италияның La Scala театры академиясының студенті, Портофино қаласында өткен XI халықаралық "CLIP 2025" опера байқауының Гран-при иегері – Әйгерім Алтынбек, Дубайда өткен "Sanremo Best Song – 2025" халықаралық орындаушылар байқауының жеңімпазы Ержан Максим, Қазанда өткен XXI халықаралық "Новая волна – 2025" байқауының жеңімпазы Александр Лим және басқа да халықаралық байқаулардың жүлдегерлері болды.
Сонымен қатар, Мәскеудегі "Интервидение – 2025" байқауының қатысушысы Ернар Садырбаев (Amre), Витебскіде өткен XXXIV халықаралық "Витебск 2025" байқауының Гран-при иегері Алмагүл Батталиева, Ставропольдегі "Soldier’s Envelope – 2025" халықаралық фестиваль-байқауының жеңімпазы, сондай-ақ Италиядағы "Open Italy – 2023" байқауында үздік деп танылған домбырашылар дуэті "Temirlan & Yernat" секілді талантты жастар бой көрсетті.
Министрлік атынан Аида Балаева өнерпаздарға алғыс хат табыстап, ізгі тілегін білдірді. Ол жас таланттардың Қазақстанның мәдени және халықаралық беделін арттыруға үлкен үлес қосып жатқанын атап өтті.
– Бүгін мереке қарсаңында, біз ел мәдениетінің дамуына үлес қосып жүрген жастармен кездесіп отырмыз. Сіздердің халықаралық деңгейдегі жетістіктеріңіз – еліміздің абыройы мен беделі. Әр өнерпаздың еңбегі мен дарынын жоғары бағалаймын. Ел мен жерге, өз ісіне деген сүйіспеншілік осындай жеңіске жетеледі. Сіздерді тәрбиелеген ата-аналарыңыз бен ұстаздарыңызға алғыс білдіремін. Өйткені олардың сіздерді өнерге баулып, таңдауларыңызды қолдауда еңбегі зор", – деді Аида Балаева.
Кездесуде жас өнерпаздар алдағы жылға өз жоспарларын таныстырып, қол жеткізген жетістіктерімен бөлісті. Сондай-ақ, мәдениет саласында жастарды қолдау мақсатында, ұсыныстарын да білдірді.
Министрліктің хабарлауынша, соңғы жылдары Қазақстандық өнерпаздар халықаралық сахналарда жоғары деңгейде өнер көрсетіп, ел абыройын асқақтатып жүр. 2025 жылдың өзінде, мәдениет саласындағы оқу орындарының 1511 студенті түрлі байқаулардың лауреаты мен дипломанты атанған.
– Бұл жетістік – ҚР Мәдениет және ақпарат министрлігі әзірлеген мәдениет саласындағы білім беруді дамыту және жастардың шығармашылық әлеуетін ынталандыру бойынша жасалған жүйелі шаралардың жемісті нәтижесі, – делінген ҚР Мәдениет және ақпарат министрлігінің баспасөз қызметі таратқан хабарламада.
