Президент жанындағы Әйелдер істері және отбасылық-демографиялық саясат жөніндегі ұлттық комиссия цифрландыру жағдайында әйелдердің экономикалық мүмкіндіктерін кеңейту мәселесін талқылады.
Отырысқа Ұлттық комиссия төрағасы, Премьер-министрдің орынбасары – Мәдениет және ақпарат министрі Аида Балаева төрағалық етті.
Жиынға Оқу-ағарту министрі Жұлдыз Сүлейменова, Мәдениет және ақпарат министрлігі мен Ұлттық экономика министрлігінің өкілдері, Ұлттық комиссия мүшелері, «Атамекен» ұлттық кәсіпкерлер палатасы, сондай-ақ онлайн форматта өңірлік әкімдіктер қатысты.
Кездесудің негізгі тақырыбы әйелдердің экономикалық мүмкіндіктерін арттыру, цифрлық экономика жағдайында әйелдер кәсіпкерлігін дамыту және жасанды интеллектті енгізу мәселелеріне арналды.
Аида Балаева өз сөзінде әйелдердің экономикалық дербестігін күшейту отбасының әл-ауқаты мен қоғамдағы әлеуметтік тұрақтылықты қамтамасыз етудің маңызды факторы екенін атап өтті.
Ұлттық экономика вице-министрі Азамат Әмрин Қазақстанда әйелдердің іскерлік белсенділігі жоғары деңгейде сақталып отырғанын мәлімдеді. Оның айтуынша, қазіргі таңда шағын және орта бизнес субъектілерінің шамамен 48%-ын әйелдер басқарады. 2025 жылғы желтоқсан айындағы дерек бойынша елде 1 миллионнан астам әйел кәсіпкер тіркелген.
Отырыс барысында цифрландыру үдерістеріне, әсіресе ауылдық жерлердегі әйелдердің қаржылық құралдарға қолжетімділігін арттыру мәселесіне ерекше назар аударылды. Ұлттық комиссия төрағасы жыл соңына дейін қолдау шаралары мен салық реформасына қатысты жаңа талаптарды түсіндіру мақсатында ұлттық ақпараттық кампания өткізуді тапсырды.
Сонымен қатар, цифрлық дағдыларды дамытуда еңбек нарығының сұранысы мен перспективалы бағыттарға басымдық беретін салалық тәсілді қолданудың маңыздылығы айтылды.
Талқылау қорытындысы бойынша цифрлық экономика жағдайында әйелдер кәсіпкерлігін дамытуға арналған кешенді жоспар әзірлеу ұсынылды. Бұдан бөлек, электрондық коммерция мен салық салу салаларындағы білім беру және онлайн бағдарламаларды кеңейту, әйелдердің цифрлық құзыреттерін дамытуға бағытталған жобаларды мемлекеттік органдар, үкіметтік емес ұйымдар, жоғары оқу орындары мен инновациялық алаңдардың қатысуымен жалғастыру көзделіп отыр.
Сондай-ақ өңірлік комиссияларға әйелдер кәсіпкерлігінің жай-күйін талдау, ауылдық бастамаларды қолдау шараларын әзірлеу және әйелдер жобаларын іске асыруға қажетті инфрақұрылымды жетілдіру жөнінде ұсыныстар берілді.
