Астанада ұшақ бортында мас күйде қоғамдық тәртіпті өрескел бұзып, бортсеріктердің айтқанына көнбеген жолаушы ұсталды. Бұл туралы Көліктегі полиция департаментіне сілтеме жасаған KAZ.NUR.KZ хабарлайды.
Полицияның хабарлауынша, Франкфурт – Астана бағытындағы әуе рейсіндегі шетел азаматы елорда әуежайындағы желілік полиция бөлімінің қызметкерлеріне тапсырылған.
Тәртіп сақшылары 48 жастағы Германия азаматының ұшақта алкогольдік мас күйде болғанын, агрессивті мінез-құлық танытып, балағат сөздер айтып, экипаж мүшелерінің заңды талаптарына бағынбағанын анықтады.
"Құқық бұзушы Қазақстан Республикасының Әкімшілік құқық бұзушылық туралы кодексінің үш бірдей бабы бойынша жауапкершілікке тартылды, яғни алкогольдік ішімдіктер ішу немесе қоғамдық орындарға масаң күйінде келу, ұсақ бұзақылық жасау, сондай-ақ әуе кемесіндегі мінез-құлық қағидаларын бұзу. Полиция әуе кемелерінде және көлік инфрақұрылымы нысандарында тәртіп сақтау – әрбір адамның азаматтығына қарамастан, міндеті екенін ескертеді", — делінген ІІМ хабарламасында.
Мәтіннен қате тапсаңыз, бізге жазыңыз
