Түркістан облысының әкімі Нұралхан Көшеровтің тапсырмасына сәйкес, өңірде кәсіпкерлікті дамыту және жаңа жұмыс орындарын ашуға бағытталған нақты шаралар қолға алынып келеді. Солардың бірі – Арыс қаласында салыну үстіндегі өндірістік парк. Арыс–Отырар тасжолының бойында орналасқан бұл өндірістік аймақтың жалпы аумағы 1,44 гектарды құрайды. Қазіргі таңда мұнда құрылыс жұмыстары қарқынды түрде жүргізілуде. Арыс қаласының әкімі Қайсар Маңқараев нысан басына барып, жобаның жүзеге асу барысымен танысты. Ол өз сөзінде инвестиция тарту арқылы жұмыс орындарын құру – мемлекеттік саясаттың маңызды басымдықтарының бірі екенін атап өтіп, құрылыс жұмыстарын белгіленген мерзімде әрі сапалы аяқтауды жауапты мамандарға тапсырды.
Жобалық жоспарға сәйкес, өндірістік паркте бес бағыттағы жоба іске асырылатын болады. Атап айтқанда, термопанельдер өндіру, пластик есік-терезелер шығару, жиһаз жасау, бақша өнімдерін терең өңдеу және тротуар плиталары мен бордюр бұйымдарын дайындау өндірістері іске қосылады деп жоспарланып отыр. Бұл жобалардың жалпы құны 215 миллион теңгені құрайды. Нысан толық іске қосылғаннан кейін 30-дан астам тұрақты жұмыс орны ашылып, жергілікті тұрғындар тұрақты табыс көзімен қамтамасыз етіледі.
Өндірістік парк алдағы уақытта Арыс қаласының индустриялық әлеуетін арттырып қана қоймай, өңірдегі шағын және орта кәсіпкерліктің дамуына жол ашып, жаңа кәсіпкерлердің пайда болуына мүмкіндік береді.
