Алматы облысы тілдерді дамыту басқармасының басшысы лауазымына Салтанат Дауыспекқызы Беспаева тағайындалды. Бұл туралы облыстық әкімдікке сілтеме жасаған KAZ.NUR.KZ хабарлайды.
Ведомствоның мәліметінше, Салтанат Беспаева жаңа қызметке 2025 жылғы 20 қазанда тағайындалған.
"Салтанат Дауыспекқызы – өңірдің білім және мәдениет саласында ұзақ жылдық тәжірибесі бар білікті маман. Бұған дейін ол облыстық білім басқармасын, сондай-ақ Іле ауданының білім бөлімін басқарған", — делінген хабарламада.
Әкімдіктің ресми сайтындағы мәліметке сүйенсек, Салтанат Беспаева 1975 жылы дүниеге келген. Абай атындағы Алматы мемлекеттік университетін "Қазақ тілі және әдебиеті" мамандығы бойынша тәмамдаған. 2024 жылы Қазақ ұлттық аграрлық зерттеу университетінде "Іскерлік әкімшелендіру" мамандығы бойынша магистр дәрежесін алған.
Еңбек жолын 2000 жылы Еңбекшіқазақ ауданындағы Ыбырай Алтынсарин атындағы орта мектептің қазақ тілі пәнінің мұғалімі ретінде бастаған. Кейін аталған мектептің педагог-ұйымдастырушысы, директордың тәрбие ісі жөніндегі орынбасары, Мұхтар Әуезов атындағы орта мектептің директоры болып еңбек еткен.
Әр жылдары Еңбекшіқазақ ауданының білім және мәдениет бөлімдерінде басшылық қызметтер атқарған. Сондай-ақ Алматы облысы білім басқармасының басшысы, Іле ауданы білім бөлімінің басшысы лауазымдарында қызмет еткен.
Естеріңізге салак кетейік, "Бағанашыл" балалар үйіне қатысты даудан кейін Алматы облысында үш шенеунік қызметінен босатылған еді. Олардың арасында облыстық білім басқармасының басшысы Салтанат Беспаева да бар.
Мәтіннен қате тапсаңыз, бізге жазыңыз
