2027 жылға қарай халықтың 100 пайызы интернетпен қамтылады. Бұл туралы үкімет отырысында премьер-министрдің орынбасары – жасанды интеллект және цифрлық даму министрі Жаслан Мәдиев мәлімдеді, деп хабарлайды KAZ.NUR.KZ үкіметтің баспасөз қызметіне сілтеме жасап.
Министрдің айтуынша, соңғы үш жылда телекоммуникация саласына 1 трлн теңгеден астам инвестиция бағытталды. Бұл елдегі интернеттің орташа жылдамдығын 94 Мбит/с дейін арттыруға мүмкіндік берді.
"Саланы дамыту 2024–2027 жылдарға арналған "Қолжетімді интернет" ұлттық жобасы аясында жүзеге асырылуда. 2027 жылдың соңына дейін халықтың 100 пайызы интернетпен қамтылады. Интернет жылдамдығы 100 Мбит/с-тан асып, оптикалық байланыс желілері ауылдық елді мекендердің 90 пайызына дейін тартылады", — деді Жаслан Мәдиев.
Вице-премьер 2026 жылдың соңына дейін тағы 3000-нан астам ауылды магистральды талшықты-оптикалық байланыс желісіне қосу көзделгенін атап өтті. Осылайшы ауылдардың 90 пайыздан астамы сымды технологиялар арқылы жоғары жылдамдықты интернетке қосылады. Осы жобаларды жүзеге асыру үшін 2027 жылдың соңына дейін жалпы көлемі 323 млрд теңгені құрайтын инвестиция қарастырылған. Шағын ауылдардың қалған 10 пайызы спутниктік технологиялар арқылы қамтамасыз етіледі.
Сонымен қатар Жаслан Мәдиевтің айтуынша, мобильді желілермен қамту артады. Мәселен, 4G желісі барлық елді мекендердің 92 пайызына дейін жетеді. Ал 5G желісі облыстық және республикалық маңызы бар 20 қалаға енгізіліп, қалалардың 60-75 пайызы аумағын қамтитын болады. 2027 жылдың соңына дейін 40 000 шақырым автожол бойы 4G мобильді интернетімен қамтамасыз етіледі.
Алаяқтықпен күресу шаралары да қабылдануда.
"Министрлік байланыс операторлары үшін жаңа талаптар енгізді. Оның ішінде абоненттерді биометриялық идентификациялау, фрод әрекеттерін заңсыз трафикке теңестіру, операторлардың антифрод жүйелері мен Ұлттық банк арасындағы өзара әрекеттесу тәртібін нақтылау қарастырылған. Қабылданған шаралар 2024 жылдың басынан бері 30 млн-нан астам күдікті қоңырауларға тосқауыл қоюға мүмкіндік берді", — деп атап өтті вице-премьер.
Мәтіннен қате тапсаңыз, бізге жазыңыз
