Қорғаныс министрлігінде ведомство басшысы авиация генерал-лейтенанты Дәурен Қосанов пен "Отбасы банктің" басқарма төрағасы Ләззат Ибрагимовамен кездесуі өтті. Бұл туралы министрлік сайтына сілтеме жасаған KAZ.NUR.KZ хабарлайды.
Кездесуде тараптар әскери қызметшілерді баспанамен қамтамасыз ету және "Әскери баспана" жеңілдетілген ипотекалық несиелеу бағдарламасын қайта жандандыру мәселелерін талқылаған.
Дәурен Қосанов бастапқы жарна мен несие бойынша пайыздық мөлшерлемені төмендету мүмкіндігін қарастыруды ұсынған.
"Әскери қызметшілер үшін жеңілдетілген ипотекалық несиелерге нақты қолжетімділік маңызды. Қазіргі уақытта ондай мүмкіндік жоқ, ал тұрғын үй бағасының өсуінен бастапқы жарна жинау іс жүзінде мүмкін емес", — деді қорғаныс министрі.
Сондай-ақ министр бұрынғыдай екінші деңгейлі нарықтан баспана сатып алу мүмкіндігін қайтаруды ұсынған. Себебі көптеген әскери қызметші жөндеуден өткен, инфрақұрылымы дамыған, қызмет орнына жақын орналасқан пәтерлерді қалайды.
Кездесу барысында Дәурен Қосанов "Баспана.кз" сайтында жарияланған жаңа талаптарға да назар аударған. Олар әскери қызметшілер үшін жалдамалы тұрғын үй рәсімдеуде қосымша қиындықтар туғызып отыр.
Кездесу қорытындысы бойынша тараптар әскери қызметшілер үшін өзекті тұрғын үй мәселелерін бірлесе шешуге дайын екендігін растаған.
Естеріңізге сала кетейік, бұған дейін үкімет сұранысқа ие "Әскери баспана" бағдарламасы қайта іске қосылатынын мәлімдеген еді.
Ол жыл сайын кемінде жеті мың әскери қызметшінің отбасына жаңа үйден бөлек, қайталама нарықтан да пәтер сатып алуға мүмкіндік береді.
Мәтіннен қате тапсаңыз, бізге жазыңыз
