Бұл жердегі ең маңыздысы – адамдардың қауіпсіздігі.
Матч уақытында Алматының кейбір көшесінде көлік қозғалысына шектеулер енгізілмек, деп хабарлайды inbusiness.kz сайты.
Футбол тойының жақсы өтуі жанкүйерлерге де байланысты. Олардың қауіпсіздігі мен тәртібін полиция қамтамасыз етеді. Құқық қорғау қызметкерлері қоғамдық тәртіпті сақтау мен трибуналардағы бақылауды, спорт нысаны маңындағы жол қозғалысын реттеуге дейінгі барлық бағытта жұмылдырылмақ. Полиция өкілдері қала қонақтары мен тұрғындарын өз бағыттарын алдын ала жоспарлап, уақытша шектеу мен кептелістерге түсіністікпен қарауға шақырып отыр.
– Алматы полициясы футбол кешінің тыныш әрі жайлы өтуі үшін барлық қажетті шараны қабылдайды. Мұндай іс-шаралардағы қауіпсіздік тек тәртіп сақшыларына ғана емес, азаматтардың жауапкершілігіне де байланысты. Жанкүйерлерден тәртіп сақтап, полициямен өзара ынтымақтастық танытуды сұраймыз, – деді Алматы қалалық ПД қоғамдық қауіпсіздік басқармасы бастығының орынбасары Тимур Ноғайбаев.
Бұған дейін "Қайрат" пен "Пафос" ойынының билеттері сатылымға шыққанын хабарлаған едік.
Еске салайық, қос команда арасындағы жауапты матч 21 қазан күні 21:45-те Алматының Орталық стадионында басталады.
