16 қазанда Үкімет тұрғын үй несиелеуді қолдау шараларын бекіткен болатын.
Ол несиелерді беру жұмысы 2025жылдың қарашасында бастау алады, деп хабарлайды inbusiness.kz сайты.
"Наурыз" және "Наурыз жұмыскер" деп аталатын ипотекалық бағдарламалар бойынша несиелеу көлемі 500 миллиард теңгеге дейін ұлғайтылып, ел тұрғындарына мол мүмкіндік беріліп жатыр.
– Қазір екі нұсқа қарастырылып жатыр: не өтінімдерді қабылдаудың жаңа конкурсын жариялау не наурыз айында қатысып, бірақ өтпей қалған азаматтарға несие беру, – деді "Отбасы банк" төрағасы Ләззат Ибрагимова.
Ең маңызды жаңалықтардың бірі – құрылыс компанияларымен офтейк-келісімшарттар жасау. Яғни, құрылыс салушылар "Отбасы банкпен" келісімге келіп, алдағы 3 жылға пәтер бағасын тұрақты деңгейде ұстауға міндеттелмек.
Айта кетейік, бағдарлама қатысушылары өзіне ұнайтын тұрғын үйді "Баспана маркет" платформасынан таңдауға құқылы. Десе де, Астана, Алматы және облыс орталықтарында тек жаңа үйден (құрылыс салушыдан тікелей жаңа пәтер) баспана таңдауға болады. Ал басқа өңірлерде кез келген баспана, соның арасында екінші нарықтағы пәтерлер мен жеке үйлерді таңдау қарастырылған.
Ипотека шарттарындағы мөлшерлеме: әлеуметтік осал топтарға – 7% болса, өзгелерге – 9%;
Сондай-ақ, бастапқы жарна: таза әрлеудегі пәтер үшін – 10%, жөндеусіз пәтер үшін – 20%.
Несие сомасы Астана мен Алматыда 36 млн теңгеге дейін, басқа өңірлерде 30 млн теңгеге дейін.
Қатысу талаптары да өте оңай:
Ол үшін соңғы 5 жылда өз атына тіркелген тұрғын үйдің болмауы керек және "Отбасы банкінде" кемінде 2 млн теңге көлемінде депозиттің болуы маңызды.
